១៧. សុបារិចរិយវគ្គោ

១. សុបារិចរិយត្ថេរអបទានំ

១. ‘‘បទុមោ នាម នាមេន, ទ្វិបទិន្ទោ នរាសភោ;

បវនា អភិនិក្ខម្ម, ធម្មំ ទេសេតិ ចក្ខុមា.

២. ‘‘យក្ខានំ សមយោ អាសិ, អវិទូរេ មហេសិនោ;

យេន កិច្ចេន សម្បត្តា, អជ្ឈាបេក្ខិំសុ តាវទេ.

៣. ‘‘ពុទ្ធស្ស គិរមញ្ញាយ, អមតស្ស ច ទេសនំ;

បសន្នចិត្តោ សុមនោ, អប្ផោដេត្វា ឧបដ្ឋហិំ.

៤. ‘‘សុចិណ្ណស្ស ផលំ បស្ស, ឧបដ្ឋានស្ស សត្ថុនោ;

តិំសកប្បសហស្សេសុ, ទុគ្គតិំ នុបបជ្ជហំ.

៥. ‘‘ឩនតិំសេ កប្បសតេ, សមលង្កតនាមកោ;

សត្តរតនសម្បន្នោ, ចក្កវត្តី មហព្ពលោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សុបារិចរិយោ ថេរោ ឥមា គាថាយោ អភាសិត្ថាតិ.

សុបារិចរិយត្ថេរស្សាបទានំ បឋមំ.

២. កណវេរបុប្ផិយត្ថេរអបទានំ

៧. ‘‘សិទ្ធត្ថោ នាម ភគវា, លោកជេដ្ឋោ នរាសភោ;

បុរក្ខតោ សាវកេហិ, នគរំ បដិបជ្ជថ.

៨. ‘‘រញ្ញោ អន្តេបុរេ អាសិំ, គោបកោ អភិសម្មតោ;

បាសាទេ ឧបវិដ្ឋោហំ, អទ្ទសំ លោកនាយកំ.

៩. ‘‘កណវេរំ [ករវីរំ (សក្កតានុលោមំ), កណវីរំ (បាកត)] គហេត្វាន, ភិក្ខុសង្ឃេ សមោកិរិំ;

ពុទ្ធស្ស វិសុំ កត្វាន, តតោ ភិយ្យោ សមោកិរិំ.

១០. ‘‘ចតុន្នវុតិតោ កប្បេ, យំ បុប្ផមភិបូជយិំ [រោបយិំ (ស្យា.)];

ទុគ្គតិំ នាភិជានាមិ, ពុទ្ធបូជាយិទំ ផលំ.

១១. ‘‘សត្តាសីតិម្ហិតោ កប្បេ, ចតុរាសុំ មហិទ្ធិកា;

សត្តរតនសម្បន្នា, ចក្កវត្តី មហព្ពលា.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កណវេរបុប្ផិយោ ថេរោ ឥមា គាថាយោ អភាសិត្ថាតិ.

កណវេរបុប្ផិយត្ថេរស្សាបទានំ ទុតិយំ.

៣. ខជ្ជកទាយកត្ថេរអបទានំ

១៣. ‘‘តិស្សស្ស ខោ ភគវតោ, បុព្ពេ ផលមទាសហំ;

នាឡិកេរញ្ច បាទាសិំ, ខជ្ជកំ អភិសម្មតំ.

១៤. ‘‘ពុទ្ធស្ស តមហំ ទត្វា, តិស្សស្ស តុ មហេសិនោ;

មោទាមហំ កាមកាមី, ឧបបជ្ជិំ [កាមការី, ឧបបជ្ជំ (សី.)] យមិច្ឆកំ [សព្ពត្ថបិ ឯវមេវ ទិស្សតិ].

១៥. ‘‘ទ្វេនវុតេ ឥតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

១៦. ‘‘ឥតោ តេរសកប្បម្ហិ, រាជា ឥន្ទសមោ អហុ;

សត្តរតនសម្បន្នោ, ចក្កវត្តី មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ខជ្ជកទាយកោ ថេរោ ឥមា គាថាយោ អភាសិត្ថាតិ.

ខជ្ជកទាយកត្ថេរស្សាបទានំ តតិយំ.

៤. ទេសបូជកត្ថេរអបទានំ

១៨. ‘‘អត្ថទស្សី តុ ភគវា, លោកជេដ្ឋោ នរាសភោ;

អព្ភុគ្គន្ត្វាន វេហាសំ, គច្ឆតេ អនិលញ្ជសេ.

១៩. ‘‘យម្ហិ ទេសេ ឋិតោ សត្ថា, អព្ភុគ្គច្ឆិ មហាមុនិ;

តាហំ ទេសំ អបូជេសិំ, បសន្នោ សេហិ បាណិភិ.

២០. ‘‘អដ្ឋារសេ កប្បសតេ, អទ្ទសំ យំ មហាមុនិំ;

ទុគ្គតិំ នាភិជានាមិ, ទេសបូជាយិទំ ផលំ.

២១. ‘‘ឯកាទសេ កប្បសតេ, គោសុជាតសនាមកោ;

សត្តរតនសម្បន្នោ, ចក្កវត្តី មហព្ពលោ.

២២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ទេសបូជកោ ថេរោ ឥមា គាថាយោ អភាសិត្ថាតិ.

ទេសបូជកត្ថេរស្សាបទានំ ចតុត្ថំ.

៥. កណិការឆត្តិយត្ថេរអបទានំ

២៣. ‘‘វេស្សភូ នាម សម្ពុទ្ធោ, លោកជេដ្ឋោ នរាសភោ;

ទិវាវិហារាយ មុនិ, ឱគាហយិ មហាវនំ.

២៤. ‘‘កណិការំ ឱចិនិត្វា, ឆត្តំ កត្វានហំ តទា;

បុប្ផច្ឆទនំ កត្វាន, ពុទ្ធស្ស អភិរោបយិំ.

២៥. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៦. ‘‘ឥតោ វីសតិកប្បម្ហិ, សោណ្ណាភា អដ្ឋ ខត្តិយា;

សត្តរតនសម្បន្នា, ចក្កវត្តី មហព្ពលា.

២៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កណិការឆត្តិយោ ថេរោ ឥមា គាថាយោ អភាសិត្ថាតិ.

កណិការឆត្តិយត្ថេរស្សាបទានំ បញ្ចមំ.

៦. សប្បិទាយកត្ថេរអបទានំ

២៨. ‘‘ផុស្សោ នាមាសិ [នាមាថ (សី.)] ភគវា, អាហុតីនំ បដិគ្គហោ;

គច្ឆតេ វីថិយំ វីរោ, និព្ពាបេន្តោ មហាជនំ.

២៩. ‘‘អនុបុព្ពេន ភគវា, អាគច្ឆិ មម សន្តិកំ;

តតោ តំ [តតោហំ (សី. ស្យា.)] បត្តំ បគ្គយ្ហ, សប្បិតេលមទាសហំ.

៣០. ‘‘ទ្វេនវុតេ ឥតោ កប្បេ, យំ សប្បិមទទិំ តទា;

ទុគ្គតិំ នាភិជានាមិ, សប្បិទានស្សិទំ ផលំ.

៣១. ‘‘ឆប្បញ្ញាសេ ឥតោ កប្បេ, ឯកោ អាសិ សមោទកោ;

សត្តរតនសម្បន្នោ, ចក្កវត្តី មហព្ពលោ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សប្បិទាយកោ ថេរោ ឥមា គាថាយោ អភាសិត្ថាតិ.

សប្បិទាយកត្ថេរស្សាបទានំ ឆដ្ឋំ.

៧. យូថិកបុប្ផិយត្ថេរអបទានំ

៣៣. ‘‘ចន្ទភាគានទីតីរេ, អនុសោតំ វជាមហំ;

សយម្ភុំ អទ្ទសំ តត្ថ, សាលរាជំវ ផុល្លិតំ.

៣៤. ‘‘បុប្ផំ យូថិកមាទាយ, ឧបគច្ឆិំ មហាមុនិំ;

បសន្នចិត្តោ សុមនោ, ពុទ្ធស្ស អភិរោបយិំ.

៣៥. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៦. ‘‘សត្តសដ្ឋិម្ហិតោ កប្បេ, ឯកោ សាមុទ្ធរោ អហុ;

សត្តរតនសម្បន្នោ, ចក្កវត្តី មហព្ពលោ.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា យូថិកបុប្ផិយោ ថេរោ ឥមា គាថាយោ អភាសិត្ថាតិ.

យូថិកបុប្ផិយត្ថេរស្សាបទានំ សត្តមំ.

៨. ទុស្សទាយកត្ថេរអបទានំ

៣៨. ‘‘តិវរាយំ បុរេ រម្មេ, រាជបុត្តោសហំ [រាជបុត្តោ អហំ (សី. ស្យា.)] តទា;

បណ្ណាការំ លភិត្វាន, ឧបសន្តស្សទាសហំ.

៣៩. ‘‘អធិវាសេសិ ភគវា, វត្ថំ [នវំ (ក.)] ហត្ថេន អាមសិ;

សិទ្ធត្ថោ អធិវាសេត្វា, វេហាសំ នភមុគ្គមិ.

៤០. ‘‘ពុទ្ធស្ស គច្ឆមានស្ស, ទុស្សា ធាវន្តិ បច្ឆតោ;

តត្ថ ចិត្តំ បសាទេសិំ, ពុទ្ធោ នោ អគ្គបុគ្គលោ.

៤១. ‘‘ចតុន្នវុតិតោ កប្បេ, យំ ទុស្សមទទិំ តទា;

ទុគ្គតិំ នាភិជានាមិ, ទុស្សទានស្សិទំ ផលំ.

៤២. ‘‘សត្តសដ្ឋិម្ហិតោ កប្បេ, ចក្កវត្តី តទា អហុ;

បរិសុទ្ធោតិ នាមេន, មនុជិន្ទោ មហព្ពលោ.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ទុស្សទាយកោ ថេរោ ឥមា គាថាយោ អភាសិត្ថាតិ.

ទុស្សទាយកត្ថេរស្សាបទានំ អដ្ឋមំ.

៩. សមាទបកត្ថេរអបទានំ

៤៤. ‘‘នគរេ ពន្ធុមតិយា, មហាបូគគណោ អហុ;

តេសាហំ បវរោ អាសិំ, មម ពទ្ធចរា [បដ្ឋចរា (ស្យា.)] ច តេ.

៤៥. ‘‘សព្ពេ តេ សន្និបាតេត្វា, បុញ្ញកម្មេ សមាទយិំ;

មាឡំ កស្សាម សង្ឃស្ស, បុញ្ញក្ខេត្តំ អនុត្តរំ.

៤៦. ‘‘សាធូតិ តេ បដិស្សុត្វា, មម ឆន្ទវសានុគា;

និដ្ឋាបេត្វា ច តំ មាឡំ, វិបស្សិស្ស អទម្ហសេ.

៤៧. ‘‘ឯកនវុតិតោ កប្បេ, យំ មាឡមទទិំ តទា;

ទុគ្គតិំ នាភិជានាមិ, មាឡទានស្សិទំ ផលំ.

៤៨. ‘‘ឯកូនសត្តតិកប្បេ [ឯកូនសដ្ឋិកប្បម្ហិ (សី. ស្យា.)],

ឯកោ អាសិ ជនាធិបោ.

អាទេយ្យោ នាម នាមេន, ចក្កវត្តី មហព្ពលោ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សមាទបកោ ថេរោ ឥមា គាថាយោ អភាសិត្ថាតិ.

សមាទបកត្ថេរស្សាបទានំ នវមំ.

១០. បញ្ចង្គុលិយត្ថេរអបទានំ

៥០. ‘‘តិស្សោ នាមាសិ ភគវា, លោកជេដ្ឋោ នរាសភោ;

បវិសតិ គន្ធកុដិំ, វិហារកុសលោ មុនិ.

៥១. ‘‘សុគន្ធមាលមាទាយ, អគមាសិំ ជិនន្តិកំ;

អបសទ្ទោ ច សម្ពុទ្ធេ, បញ្ចង្គុលិមទាសហំ.

៥២. ‘‘ទ្វេនវុតេ ឥតោ កប្បេ, យំ គន្ធមភិរោបយិំ;

ទុគ្គតិំ នាភិជានាមិ, បញ្ចង្គុលិស្សិទំ [បញ្ចង្គុលិយិទំ (សី.)] ផលំ.

៥៣. ‘‘ទ្វេសត្តតិម្ហិតោ កប្បេ, រាជា អាសិំ សយម្បភោ;

សត្តរតនសម្បន្នោ, ចក្កវត្តី មហព្ពលោ.

៥៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បញ្ចង្គុលិយោ ថេរោ ឥមា គាថាយោ អភាសិត្ថាតិ;

បញ្ចង្គុលិយត្ថេរស្សាបទានំ ទសមំ.

សុបារិចរិយវគ្គោ សត្តរសមោ.