៣. ខជ្ជកទាយកត្ថេរអបទានំ

១៣. ‘‘តិស្សស្ស ខោ ភគវតោ, បុព្ពេ ផលមទាសហំ;

នាឡិកេរញ្ច បាទាសិំ, ខជ្ជកំ អភិសម្មតំ.

១៤. ‘‘ពុទ្ធស្ស តមហំ ទត្វា, តិស្សស្ស តុ មហេសិនោ;

មោទាមហំ កាមកាមី, ឧបបជ្ជិំ [កាមការី, ឧបបជ្ជំ (សី.)] យមិច្ឆកំ [សព្ពត្ថបិ ឯវមេវ ទិស្សតិ].

១៥. ‘‘ទ្វេនវុតេ ឥតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

១៦. ‘‘ឥតោ តេរសកប្បម្ហិ, រាជា ឥន្ទសមោ អហុ;

សត្តរតនសម្បន្នោ, ចក្កវត្តី មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ខជ្ជកទាយកោ ថេរោ ឥមា គាថាយោ អភាសិត្ថាតិ.

ខជ្ជកទាយកត្ថេរស្សាបទានំ តតិយំ.