៦. កទម្ពបុប្ផិយត្ថេរអបទានំ

៣០. ‘‘ហិមវន្តស្សាវិទូរេ, កុក្កុដោ នាម បព្ពតោ;

តម្ហិ បព្ពតបាទម្ហិ, សត្ត ពុទ្ធា វសន្តិ តេ.

៣១. ‘‘កទម្ពំ បុប្ផិតំ ទិស្វា, ទីបរាជំវ ឧគ្គតំ;

ឧភោ ហត្ថេហិ បគ្គយ្ហ, សត្ត ពុទ្ធេ សមោកិរិំ.

៣២. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៣. ‘‘ទ្វេនវុតេ ឥតោ កប្បេ, សត្តាសុំ បុប្ផនាមកា;

សត្តរតនសម្បន្នា, ចក្កវត្តី មហព្ពលា.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កទម្ពបុប្ផិយោ ថេរោ ឥមា គាថាយោ អភាសិត្ថាតិ;

កទម្ពបុប្ផិយត្ថេរស្សាបទានំ ឆដ្ឋំ.