១៦. ពន្ធុជីវកវគ្គោ

១. ពន្ធុជីវកត្ថេរអបទានំ

១. ‘‘ចន្ទំវ វិមលំ សុទ្ធំ, វិប្បសន្នមនាវិលំ;

នន្ទីភវបរិក្ខីណំ, តិណ្ណំ លោកេ វិសត្តិកំ.

២. ‘‘និព្ពាបយន្តំ ជនតំ, តិណ្ណំ [ទិស្វា (?)] តារយតំ វរំ [តារយតំ មុនិំ (ស្យា.)];

មុនិំ វនម្ហិ ឈាយន្តំ [វនស្មិំ ឈាយមានំ តំ (សី. ស្យា.)], ឯកគ្គំ សុសមាហិតំ.

៣. ‘‘ពន្ធុជីវកបុប្ផានិ, លគេត្វា សុត្តកេនហំ;

ពុទ្ធស្ស អភិរោបយិំ, សិខិនោ លោកពន្ធុនោ.

៤. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥. ‘‘ឥតោ សត្តមកេ កប្បេ, មនុជិន្ទោ មហាយសោ;

សមន្តចក្ខុ នាមាសិ, ចក្កវត្តី មហព្ពលោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ពន្ធុជីវកោ ថេរោ ឥមា គាថាយោ អភាសិត្ថាតិ.

ពន្ធុជីវកត្ថេរស្សាបទានំ បឋមំ.

២. តម្ពបុប្ផិយត្ថេរអបទានំ

៧. ‘‘បរកម្មាយនេ យុត្តោ, អបរាធំ អកាសហំ;

វនន្តំ អភិធាវិស្សំ, ភយវេរសមប្បិតោ.

៨. ‘‘បុប្ផិតំ បាទបំ ទិស្វា, បិណ្ឌិពន្ធំ សុនិម្មិតំ;

តម្ពបុប្ផំ គហេត្វាន, ពោធិយំ ឱកិរិំ អហំ.

៩. ‘‘សម្មជ្ជិត្វាន តំ ពោធិំ, បាដលិំ បាទបុត្តមំ;

បល្លង្កំ អាភុជិត្វាន, ពោធិមូលេ ឧបាវិសិំ.

១០. ‘‘គតមគ្គំ គវេសន្តា, អាគច្ឆុំ មម សន្តិកំ;

តេ ច ទិស្វានហំ តត្ថ, អាវជ្ជិំ ពោធិមុត្តមំ.

១១. ‘‘វន្ទិត្វាន អហំ ពោធិំ, វិប្បសន្នេន ចេតសា;

អនេកតាលេ បបតិំ, គិរិទុគ្គេ ភយានកេ.

១២. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពោធិបូជាយិទំ ផលំ.

១៣. ‘‘ឥតោ ច តតិយេ កប្បេ, រាជា សុសញ្ញតោ អហំ [សំថុសិតោ អហុំ (សី.)];

សត្តរតនសម្បន្នោ, ចក្កវត្តី មហព្ពលោ.

១៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តម្ពបុប្ផិយោ ថេរោ ឥមា គាថាយោ អភាសិត្ថាតិ.

តម្ពបុប្ផិយត្ថេរស្សាបទានំ ទុតិយំ.

៣. វីថិសម្មជ្ជកត្ថេរអបទានំ

១៥. ‘‘ឧទេន្តំ សតរំសិំវ, បីតរំសិំវ [សិតរំសិំវ (សី. ស្យា.)] ភាណុមំ;

បន្នរសេ យថា ចន្ទំ, និយ្យន្តំ លោកនាយកំ.

១៦. ‘‘អដ្ឋសដ្ឋិសហស្សានិ, សព្ពេ ខីណាសវា អហុំ;

បរិវារិំសុ សម្ពុទ្ធំ, ទ្វិបទិន្ទំ នរាសភំ.

១៧. ‘‘សម្មជ្ជិត្វាន តំ វីថិំ, និយ្យន្តេ លោកនាយកេ;

ឧស្សាបេសិំ ធជំ តត្ថ, វិប្បសន្នេន ចេតសា.

១៨. ‘‘ឯកនវុតិតោ កប្បេ, យំ ធជំ អភិរោបយិំ;

ទុគ្គតិំ នាភិជានាមិ, ធជទានស្សិទំ ផលំ.

១៩. ‘‘ឥតោ ចតុត្ថកេ កប្បេ, រាជាហោសិំ មហព្ពលោ;

សព្ពាការេន សម្បន្នោ, សុធជោ ឥតិ វិស្សុតោ.

២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វីថិសម្មជ្ជកោ ថេរោ ឥមា គាថាយោ អភាសិត្ថាតិ.

វីថិសម្មជ្ជកត្ថេរស្សាបទានំ តតិយំ.

៤. កក្ការុបុប្ផបូជកត្ថេរអបទានំ

២១. ‘‘ទេវបុត្តោ អហំ សន្តោ, បូជយិំ សិខិនាយកំ;

កក្ការុបុប្ផំ បគ្គយ្ហ, ពុទ្ធស្ស អភិរោបយិំ.

២២. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៣. ‘‘ឥតោ ច នវមេ កប្បេ, រាជា សត្តុត្តមោ អហុំ;

សត្តរតនសម្បន្នោ, ចក្កវត្តី មហព្ពលោ.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កក្ការុបុប្ផបូជកោ ថេរោ ឥមា គាថាយោ អភាសិត្ថាតិ.

កក្ការុបុប្ផបូជកត្ថេរស្សាបទានំ ចតុត្ថំ.

៥. មន្ទារវបុប្ផបូជកត្ថេរអបទានំ

២៥. ‘‘ទេវបុត្តោ អហំ សន្តោ, បូជយិំ សិខិនាយកំ;

មន្ទារវេន បុប្ផេន, ពុទ្ធស្ស អភិរោបយិំ.

២៦. ‘‘សត្តាហំ ឆទនំ អាសិ, ទិព្ពំ មាលំ តថាគតេ;

សព្ពេ ជនា សមាគន្ត្វា, នមស្សិំសុ តថាគតំ.

២៧. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៨. ‘‘ឥតោ ច ទសមេ កប្បេ, រាជាហោសិំ ជុតិន្ធរោ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មន្ទារវបុប្ផបូជកោ ថេរោ ឥមា គាថាយោ អភាសិត្ថាតិ.

មន្ទារវបុប្ផបូជកត្ថេរស្សាបទានំ បញ្ចមំ.

៦. កទម្ពបុប្ផិយត្ថេរអបទានំ

៣០. ‘‘ហិមវន្តស្សាវិទូរេ, កុក្កុដោ នាម បព្ពតោ;

តម្ហិ បព្ពតបាទម្ហិ, សត្ត ពុទ្ធា វសន្តិ តេ.

៣១. ‘‘កទម្ពំ បុប្ផិតំ ទិស្វា, ទីបរាជំវ ឧគ្គតំ;

ឧភោ ហត្ថេហិ បគ្គយ្ហ, សត្ត ពុទ្ធេ សមោកិរិំ.

៣២. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៣. ‘‘ទ្វេនវុតេ ឥតោ កប្បេ, សត្តាសុំ បុប្ផនាមកា;

សត្តរតនសម្បន្នា, ចក្កវត្តី មហព្ពលា.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កទម្ពបុប្ផិយោ ថេរោ ឥមា គាថាយោ អភាសិត្ថាតិ;

កទម្ពបុប្ផិយត្ថេរស្សាបទានំ ឆដ្ឋំ.

៧. តិណសូលកត្ថេរអបទានំ

៣៥. ‘‘ហិមវន្តស្សាវិទូរេ, ភូតគណោ នាម បព្ពតោ;

វសតេកោ ជិនោ តត្ថ, សយម្ភូ លោកនិស្សដោ.

៣៦. ‘‘តិណសូលំ គហេត្វាន, ពុទ្ធស្ស អភិរោបយិំ;

ឯកូនសតសហស្សំ, កប្បំ ន វិនិបាតិកោ.

៣៧. ‘‘ឥតោ ឯកាទសេ កប្បេ, ឯកោសិំ ធរណីរុហោ;

សត្តរតនសម្បន្នោ, ចក្កវត្តី មហព្ពលោ.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណសូលកោ ថេរោ ឥមា គាថាយោ អភាសិត្ថាតិ.

តិណសូលកត្ថេរស្សាបទានំ សត្តមំ.

៨. នាគបុប្ផិយត្ថេរអបទានំ

៣៩. ‘‘សុវច្ឆោ នាម នាមេន, ព្រាហ្មណោ មន្តបារគូ;

បុរក្ខតោ សសិស្សេហិ, វសតេ បព្ពតន្តរេ.

៤០. ‘‘បទុមុត្តរោ នាម ជិនោ, អាហុតីនំ បដិគ្គហោ;

មមុទ្ធរិតុកាមោ សោ, អាគច្ឆិ មម សន្តិកំ.

៤១. ‘‘វេហាសម្ហិ ចង្កមតិ, ធូបាយតិ ជលតេ តថា;

ហាសំ មមំ វិទិត្វាន, បក្កាមិ បាចិនាមុខោ.

៤២. ‘‘តញ្ច អច្ឆរិយំ ទិស្វា, អព្ភុតំ លោមហំសនំ;

នាគបុប្ផំ គហេត្វាន, គតមគ្គម្ហិ ឱកិរិំ.

៤៣. ‘‘សតសហស្សិតោ កប្បេ, យំ បុប្ផំ ឱកិរិំ អហំ;

តេន ចិត្តប្បសាទេន, ទុគ្គតិំ នុបបជ្ជហំ.

៤៤. ‘‘ឯកត្តិំសេ កប្បសតេ [ឯកតិំសេ ឥតោ កម្មេ (ស្យា.)], រាជា អាសិ មហារហោ;

សត្តរតនសម្បន្នោ, ចក្កវត្តី មហព្ពលោ.

៤៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នាគបុប្ផិយោ ថេរោ ឥមា គាថាយោ អភាសិត្ថាតិ.

នាគបុប្ផិយត្ថេរស្សាបទានំ អដ្ឋមំ.

៩. បុន្នាគបុប្ផិយត្ថេរអបទានំ

៤៦. ‘‘កាននំ វនមោគយ្ហ, វសាមិ លុទ្ទកោ អហំ;

បុន្នាគំ បុប្ផិតំ ទិស្វា, ពុទ្ធសេដ្ឋំ អនុស្សរិំ.

៤៧. ‘‘តំ បុប្ផំ ឱចិនិត្វាន, សុគន្ធំ គន្ធិតំ សុភំ;

ថូបំ ករិត្វា បុលិនេ, ពុទ្ធស្ស អភិរោបយិំ.

៤៨. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៩. ‘‘ឯកម្ហិ នវុតេ កប្បេ, ឯកោ អាសិំ តមោនុទោ;

សត្តរតនសម្បន្នោ, ចក្កវត្តី មហព្ពលោ.

៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុន្នាគបុប្ផិយោ ថេរោ ឥមា គាថាយោ អភាសិត្ថាតិ.

បុន្នាគបុប្ផិយត្ថេរស្សាបទានំ នវមំ.

១០. កុមុទទាយកត្ថេរអបទានំ

៥១. ‘‘ហិមវន្តស្សាវិទូរេ, មហាជាតស្សរោ អហុ;

បទុមុប្បលសញ្ឆន្នោ, បុណ្ឌរីកសមោត្ថដោ.

៥២. ‘‘កុកុត្ថោ នាម នាមេន, តត្ថាសិំ សកុណោ តទា;

សីលវា ពុទ្ធិសម្បន្នោ, បុញ្ញាបុញ្ញេសុ កោវិទោ.

៥៣. ‘‘បទុមុត្តរោ លោកវិទូ, អាហុតីនំ បដិគ្គហោ;

ជាតស្សរស្សាវិទូរេ, សញ្ចរិត្ថ មហាមុនិ.

៥៤. ‘‘ជលជំ កុមុទំ ឆេត្វា, ឧបនេសិំ មហេសិនោ;

មម សង្កប្បមញ្ញាយ, បដិគ្គហិ មហាមុនិ.

៥៥. ‘‘តញ្ច ទានំ ទទិត្វាន, សុក្កមូលេន ចោទិតោ;

កប្បានំ សតសហស្សំ, ទុគ្គតិំ នុបបជ្ជហំ.

៥៦. ‘‘សោឡសេតោ កប្បសតេ, អាសុំ វរុណនាមកា;

អដ្ឋ ឯតេ ជនាធិបា, ចក្កវត្តី មហព្ពលា.

៥៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុមុទទាយកោ ថេរោ ឥមា គាថាយោ អភាសិត្ថាតិ.

កុមុទទាយកត្ថេរស្សាបទានំ ទសមំ.

ពន្ធុជីវកវគ្គោ សោឡសមោ.