១០. កុមុទទាយកត្ថេរអបទានំ

៥១. ‘‘ហិមវន្តស្សាវិទូរេ, មហាជាតស្សរោ អហុ;

បទុមុប្បលសញ្ឆន្នោ, បុណ្ឌរីកសមោត្ថដោ.

៥២. ‘‘កុកុត្ថោ នាម នាមេន, តត្ថាសិំ សកុណោ តទា;

សីលវា ពុទ្ធិសម្បន្នោ, បុញ្ញាបុញ្ញេសុ កោវិទោ.

៥៣. ‘‘បទុមុត្តរោ លោកវិទូ, អាហុតីនំ បដិគ្គហោ;

ជាតស្សរស្សាវិទូរេ, សញ្ចរិត្ថ មហាមុនិ.

៥៤. ‘‘ជលជំ កុមុទំ ឆេត្វា, ឧបនេសិំ មហេសិនោ;

មម សង្កប្បមញ្ញាយ, បដិគ្គហិ មហាមុនិ.

៥៥. ‘‘តញ្ច ទានំ ទទិត្វាន, សុក្កមូលេន ចោទិតោ;

កប្បានំ សតសហស្សំ, ទុគ្គតិំ នុបបជ្ជហំ.

៥៦. ‘‘សោឡសេតោ កប្បសតេ, អាសុំ វរុណនាមកា;

អដ្ឋ ឯតេ ជនាធិបា, ចក្កវត្តី មហព្ពលា.

៥៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុមុទទាយកោ ថេរោ ឥមា គាថាយោ អភាសិត្ថាតិ.

កុមុទទាយកត្ថេរស្សាបទានំ ទសមំ.

ពន្ធុជីវកវគ្គោ សោឡសមោ.