៨. ផលកទាយកត្ថេរអបទានំ

៣៧. ‘‘យានការោ បុរេ អាសិំ, ទារុកម្មេ សុសិក្ខិតោ;

ចន្ទនំ ផលកំ កត្វា, អទាសិំ លោកពន្ធុនោ.

៣៨. ‘‘បភាសតិ ឥទំ ព្យម្ហំ, សុវណ្ណស្ស សុនិម្មិតំ;

ហត្ថិយានំ អស្សយានំ, ទិព្ពយានំ ឧបដ្ឋិតំ.

៣៩. ‘‘បាសាទា សិវិកា ចេវ, និព្ពត្តន្តិ យទិច្ឆកំ;

អក្ខុព្ភំ [អក្ខោភំ (សី.)] រតនំ មយ្ហំ, ផលកស្ស ឥទំ ផលំ.

៤០. ‘‘ឯកនវុតិតោ កប្បេ, ផលកំ យមហំ ទទិំ;

ទុគ្គតិំ នាភិជានាមិ, ផលកស្ស ឥទំ ផលំ.

៤១. ‘‘សត្តបញ្ញាសកប្បម្ហិ, ចតុរោ និម្មិតាវ្ហយា;

សត្តរតនសម្បន្នា, ចក្កវត្តី មហព្ពលា.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលកទាយកោ ថេរោ ឥមា គាថាយោ អភាសិត្ថាតិ.

ផលកទាយកត្ថេរស្សាបទានំ អដ្ឋមំ.