៩. វដំសកិយត្ថេរអបទានំ

៤៣. ‘‘សុមេធោ នាម នាមេន, សយម្ភូ អបរាជិតោ;

វិវេកមនុព្រូហន្តោ, អជ្ឈោគហិ មហាវនំ.

៤៤. ‘‘សឡលំ បុប្ផិតំ ទិស្វា, គន្ថិត្វាន [ពន្ធិត្វាន (សី.)] វដំសកំ;

ពុទ្ធស្ស អភិរោបេសិំ, សម្មុខា លោកនាយកំ.

៤៥. ‘‘តិំសកប្បសហស្សម្ហិ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៦. ‘‘ឩនវីសេ កប្បសតេ, សោឡសាសុំ សុនិម្មិតា;

សត្តរតនសម្បន្នា, ចក្កវត្តី មហព្ពលា.

៤៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វដំសកិយោ ថេរោ ឥមា គាថាយោ អភាសិត្ថាតិ.

វដំសកិយត្ថេរស្សាបទានំ នវមំ.