៩. សាលបុប្ផទាយកត្ថេរអបទានំ

៦០. ‘‘មិគរាជា តទា អាសិំ, អភិជាតោ សុកេសរី;

គិរិទុគ្គំ គវេសន្តោ, អទ្ទសំ លោកនាយកំ.

៦១. ‘‘អយំ នុ ខោ មហាវីរោ, និព្ពាបេតិ មហាជនំ;

យំនូនាហំ ឧបាសេយ្យំ, ទេវទេវំ នរាសភំ.

៦២. ‘‘សាខំ សាលស្ស ភញ្ជិត្វា, សកោសំ បុប្ផមាហរិំ;

ឧបគន្ត្វាន សម្ពុទ្ធំ, អទាសិំ បុប្ផមុត្តមំ.

៦៣. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផទានស្សិទំ ផលំ.

៦៤. ‘‘ឥតោ ច នវមេ កប្បេ, វិរោចនសនាមកា;

តយោ អាសិំសុ រាជានោ, ចក្កវត្តី មហព្ពលា.

៦៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សាលបុប្ផទាយកោ ថេរោ ឥមា គាថាយោ អភាសិត្ថាតិ.

សាលបុប្ផទាយកត្ថេរស្សាបទានំ នវមំ.