១០. បិយាលផលទាយកត្ថេរអបទានំ

៦៦. ‘‘បារាវតោ [បរោធកោ (ស្យា.)] តទា អាសិំ, បរំ អនុបរោធកោ;

បព្ភារេ សេយ្យំ កប្បេមិ, អវិទូរេ សិខិសត្ថុនោ.

៦៧. ‘‘សាយំ បាតញ្ច បស្សាមិ, ពុទ្ធំ លោកគ្គនាយកំ;

ទេយ្យធម្មោ ច មេ នត្ថិ, ទ្វិបទិន្ទស្ស តាទិនោ.

៦៨. ‘‘បិយាលផលមាទាយ, អគមំ ពុទ្ធសន្តិកំ;

បដិគ្គហេសិ ភគវា, លោកជេដ្ឋោ នរាសភោ.

៦៩. ‘‘តតោ បរំ ឧបាទាយ, បរិចារិំ វិនាយកំ;

តេន ចិត្តប្បសាទេន, តត្ថ កាលង្កតោ អហំ.

៧០. ‘‘ឯកត្តិំសេ ឥតោ កប្បេ, យំ ផលំ អទទិំ អហំ;

ទុគ្គតិំ នាភិជានាមិ, ផលទានស្សិទំ ផលំ.

៧១. ‘‘ឥតោ បន្នរសេ កប្បេ, តយោ អាសុំ បិយាលិនោ;

សត្តរតនសម្បន្នា, ចក្កវត្តី មហព្ពលា.

៧២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បិយាលផលទាយកោ ថេរោ ឥមា គាថាយោ អភាសិត្ថាតិ.

បិយាលផលទាយកត្ថេរស្សាបទានំ ទសមំ.

សោភិតវគ្គោ ចុទ្ទសមោ.