៦. ចម្បកបុប្ផិយត្ថេរអបទានំ

៤១. ‘‘កណិការំវ ជោតន្តំ, និសិន្នំ បព្ពតន្តរេ;

ឱភាសេន្តំ ទិសា សព្ពា, ឱសធិំ វិយ តារកំ [ឱសធី វិយ តារកា (ក.)].

៤២. ‘‘តយោ មាណវកា អាសុំ, សកេ សិប្បេ សុសិក្ខិតា;

ខារិភារំ គហេត្វាន, អន្វេន្តិ មម បច្ឆតោ.

៤៣. ‘‘បុដកេ សត្ត បុប្ផានិ, និក្ខិត្តានិ តបស្សិនា;

គហេត្វា តានិ ញាណម្ហិ, វេស្សភុស្សាភិរោបយិំ.

៤៤. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ញាណបូជាយិទំ ផលំ.

៤៥. ‘‘ឯកូនតិំសកប្បម្ហិ, វិបុលាភ [វិហតាភា (ស្យា.)] សនាមកោ;

សត្តរតនសម្បន្នោ, ចក្កវត្តី [រាជា ហោសិ (ក.)] មហព្ពលោ.

៤៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចម្បកបុប្ផិយោ ថេរោ ឥមា គាថាយោ អភាសិត្ថាតិ;

ចម្បកបុប្ផិយត្ថេរស្សាបទានំ ឆដ្ឋំ.