៧. អត្ថសន្ទស្សកត្ថេរអបទានំ

៤៧. ‘‘វិសាលមាឡេ អាសីនោ, អទ្ទសំ លោកនាយកំ;

ខីណាសវំ ពលប្បត្តំ, ភិក្ខុសង្ឃបុរក្ខតំ.

៤៨. ‘‘សតសហស្សា តេវិជ្ជា, ឆឡភិញ្ញា មហិទ្ធិកា;

បរិវារេន្តិ សម្ពុទ្ធំ, កោ ទិស្វា នប្បសីទតិ.

៤៩. ‘‘ញាណេ ឧបនិធា យស្ស, ន វិជ្ជតិ សទេវកេ;

អនន្តញាណំ សម្ពុទ្ធំ, កោ ទិស្វា នប្បសីទតិ.

៥០. ‘‘ធម្មកាយញ្ច ទីបេន្តំ, កេវលំ រតនាករំ;

វិកប្បេតុំ [វិកោបេតុំ (សី. ស្យា.)] ន សក្កោន្តិ, កោ ទិស្វា នប្បសីទតិ.

៥១. ‘‘ឥមាហិ តីហិ គាថាហិ, នារទោវ្ហយវច្ឆលោ [សរគច្ឆិយោ (សី.), បុរគច្ឆិយោ (ស្យា.)];

បទុមុត្តរំ ថវិត្វាន, សម្ពុទ្ធំ អបរាជិតំ.

៥២. ‘‘តេន ចិត្តប្បសាទេន, ពុទ្ធសន្ថវនេន ច;

កប្បានំ សតសហស្សំ, ទុគ្គតិំ, នុបបជ្ជហំ.

៥៣. ‘‘ឥតោ តិំសកប្បសតេ, សុមិត្តោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៥៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អត្ថសន្ទស្សកោ ថេរោ ឥមា គាថាយោ អភាសិត្ថាតិ.

អត្ថសន្ទស្សកត្ថេរស្សាបទានំ សត្តមំ.