៣. ចន្ទនបូជនកត្ថេរអបទានំ

១៧. ‘‘ចន្ទភាគានទីតីរេ, អហោសិំ កិន្នរោ តទា;

បុប្ផភក្ខោ ចហំ អាសិំ, បុប្ផានិវសនោ តថា [បុប្ផានំ វសនោ អហំ (ស្យា.)].

១៨. ‘‘អត្ថទស្សី តុ ភគវា, លោកជេដ្ឋោ នរាសភោ;

វិបិនគ្គេន និយ្យាសិ, ហំសរាជាវ អម្ពរេ.

១៩. ‘‘នមោ តេ បុរិសាជញ្ញ, ចិត្តំ តេ សុវិសោធិតំ;

បសន្នមុខវណ្ណោសិ, វិប្បសន្នមុខិន្ទ្រិយោ.

២០. ‘‘ឱរោហិត្វាន អាកាសា, ភូរិបញ្ញោ សុមេធសោ;

សង្ឃាដិំ បត្ថរិត្វាន, បល្លង្កេន ឧបាវិសិ.

២១. ‘‘វិលីនំ ចន្ទនាទាយ, អគមាសិំ ជិនន្តិកំ;

បសន្នចិត្តោ សុមនោ, ពុទ្ធស្ស អភិរោបយិំ.

២២. ‘‘អភិវាទេត្វាន សម្ពុទ្ធំ, លោកជេដ្ឋំ នរាសភំ;

បាមោជ្ជំ ជនយិត្វាន, បក្កាមិំ ឧត្តរាមុខោ.

២៣. ‘‘អដ្ឋារសេ កប្បសតេ, ចន្ទនំ យំ អបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៤. ‘‘ចតុទ្ទសេ កប្បសតេ, ឥតោ អាសិំសុ តេ តយោ;

រោហណី នាម [រោហិតា នាម (សី.), រោហិណី នាម (ស្យា.)] នាមេន, ចក្កវត្តី មហព្ពលា.

២៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចន្ទនបូជនកោ ថេរោ ឥមា គាថាយោ អភាសិត្ថាតិ;

ចន្ទនបូជនកត្ថេរស្សាបទានំ តតិយំ.

អដ្ឋមភាណវារំ.