៤. បុប្ផច្ឆទនិយត្ថេរអបទានំ

២៦. ‘‘សុនន្ទោ នាម នាមេន, ព្រាហ្មណោ មន្តបារគូ;

អជ្ឈាយកោ យាចយោគោ, វាជបេយ្យំ អយាជយិ.

២៧. ‘‘បទុមុត្តរោ លោកវិទូ, អគ្គោ ការុណិកោ ឥសិ;

ជនតំ អនុកម្បន្តោ, អម្ពរេ ចង្កមី តទា.

២៨. ‘‘ចង្កមិត្វាន សម្ពុទ្ធោ, សព្ពញ្ញូ លោកនាយកោ;

មេត្តាយ អផរិ សត្តេ, អប្បមាណេ [អប្បមាណំ (សី. ស្យា.)] និរូបធិ.

២៩. ‘‘វណ្ដេ ឆេត្វាន បុប្ផានិ, ព្រាហ្មណោ មន្តបារគូ;

សព្ពេ សិស្សេ សមានេត្វា, អាកាសេ ឧក្ខិបាបយិ.

៣០. ‘‘យាវតា នគរំ អាសិ, បុប្ផានំ ឆទនំ តទា;

ពុទ្ធស្ស អានុភាវេន, សត្តាហំ ន វិគច្ឆថ.

៣១. ‘‘តេនេវ សុក្កមូលេន, អនុភោត្វាន សម្បទា;

សព្ពាសវេ បរិញ្ញាយ, តិណ្ណោ លោកេ វិសត្តិកំ.

៣២. ‘‘ឯការសេ កប្បសតេ, បញ្ចតិំសាសុ ខត្តិយា;

អម្ពរំសសនាមា តេ, ចក្កវត្តី មហព្ពលា.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុប្ផច្ឆទនិយោ ថេរោ ឥមា គាថាយោ អភាសិត្ថាតិ.

បុប្ផច្ឆទនិយត្ថេរស្សាបទានំ ចតុត្ថំ.