៨. ញាណសញ្ញិកត្ថេរអបទានំ

៨៤. ‘‘បព្ពតេ ហិមវន្តម្ហិ, វសាមិ បព្ពតន្តរេ;

បុលិនំ សោភនំ ទិស្វា, ពុទ្ធសេដ្ឋំ អនុស្សរិំ.

៨៥. ‘‘ញាណេ ឧបនិធា នត្ថិ, សង្ខារំ [សង្គាមំ (សី. ស្យា.), សង្ខាតំ (ថេរគាថា អដ្ឋ.)] នត្ថិ សត្ថុនោ;

សព្ពធម្មំ អភិញ្ញាយ, ញាណេន អធិមុច្ចតិ.

៨៦. ‘‘នមោ តេ បុរិសាជញ្ញ, នមោ តេ បុរិសុត្តម;

ញាណេន តេ សមោ នត្ថិ, យាវតា ញាណមុត្តមំ.

៨៧. ‘‘ញាណេ ចិត្តំ បសាទេត្វា, កប្បំ សគ្គម្ហិ មោទហំ;

អវសេសេសុ កប្បេសុ, កុសលំ ចរិតំ [ករិតំ (សី. ស្យា.), កិរិយំ (ក.)] មយា.

៨៨. ‘‘ឯកនវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ញាណសញ្ញាយិទំ ផលំ.

៨៩. ‘‘ឥតោ សត្តតិកប្បម្ហិ [តេសត្តតិកប្បេ (សី. ស្យា.)], ឯកោ បុលិនបុប្ផិយោ;

សត្តរតនសម្បន្នោ, ចក្កវត្តី មហព្ពលោ.

៩០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ញាណសញ្ញិកោ ថេរោ ឥមា គាថាយោ អភាសិត្ថាតិ.

ញាណសញ្ញិកត្ថេរស្សាបទានំ អដ្ឋមំ.