៩. គណ្ឋិបុប្ផិយត្ថេរអបទានំ

៩១. ‘‘សុវណ្ណវណ្ណោ សម្ពុទ្ធោ, វិបស្សី ទក្ខិណារហោ;

បុរក្ខតោ សាវកេហិ, អារាមា អភិនិក្ខមិ.

៩២. ‘‘ទិស្វានហំ ពុទ្ធសេដ្ឋំ, សព្ពញ្ញុំ តមនាសកំ;

បសន្នចិត្តោ សុមនោ, គណ្ឋិបុប្ផំ [គតមគ្គំ (ស្យា. ក.)] អបូជយិំ.

៩៣. ‘‘តេន ចិត្តប្បសាទេន, ទ្វិបទិន្ទស្ស តាទិនោ;

ហដ្ឋោ ហដ្ឋេន ចិត្តេន, បុន វន្ទិំ តថាគតំ.

៩៤. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៩៥. ‘‘ឯកតាលីសិតោ កប្បេ, ចរណោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៩៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គណ្ឋិបុប្ផិយោ [គន្ធបុប្ផិយោ (ស្យា. ក.)] ថេរោ ឥមា គាថាយោ អភាសិត្ថាតិ.

គណ្ឋិបុប្ផិយត្ថេរស្សាបទានំ នវមំ.