៧. ផលទាយកត្ថេរអបទានំ

៧៥. ‘‘អជ្ឈាយកោ មន្តធរោ, តិណ្ណំ វេទាន បារគូ;

ហិមវន្តស្សាវិទូរេ, វសាមិ អស្សមេ អហំ.

៧៦. ‘‘អគ្គិហុត្តញ្ច មេ អត្ថិ, បុណ្ឌរីកផលានិ ច;

បុដកេ និក្ខិបិត្វាន, ទុមគ្គេ លគ្គិតំ មយា.

៧៧. ‘‘បទុមុត្តរោ លោកវិទូ, អាហុតីនំ បដិគ្គហោ;

មមុទ្ធរិតុកាមោ សោ, ភិក្ខន្តោ មមុបាគមិ.

៧៨. ‘‘បសន្នចិត្តោ សុមនោ, ផលំ ពុទ្ធស្សទាសហំ;

វិត្តិសញ្ជននោ មយ្ហំ, ទិដ្ឋធម្មសុខាវហោ.

៧៩. ‘‘សុវណ្ណវណ្ណោ សម្ពុទ្ធោ, អាហុតីនំ បដិគ្គហោ;

អន្តលិក្ខេ ឋិតោ សត្ថា, ឥមំ គាថំ អភាសថ.

៨០. ‘‘‘ឥមិនា ផលទានេន, ចេតនាបណិធីហិ ច;

កប្បានំ សតសហស្សំ, ទុគ្គតិំ នុបបជ្ជសិ’.

៨១. ‘‘តេនេវ សុក្កមូលេន, អនុភោត្វាន សម្បទា;

បត្តោម្ហិ អចលំ ឋានំ, ហិត្វា ជយបរាជយំ.

៨២. ‘‘ឥតោ សត្តសតេ កប្បេ, រាជា អាសិំ សុមង្គលោ;

សត្តរតនសម្បន្នោ ចក្កវត្តី មហព្ពលោ.

៨៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ សត្តមំ.