៩. បច្ចុបដ្ឋានសញ្ញកត្ថេរអបទានំ

៧២. ‘‘អត្ថទស្សិម្ហិ សុគតេ, និព្ពុតេ សមនន្តរា;

យក្ខយោនិំ ឧបបជ្ជិំ, យសំ បត្តោ ចហំ តទា.

៧៣. ‘‘ទុល្លទ្ធំ វត មេ អាសិ, ទុប្បភាតំ ទុរុដ្ឋិតំ;

យំ មេ ភោគេ វិជ្ជមានេ, បរិនិព្ពាយិ ចក្ខុមា.

៧៤. ‘‘មម សង្កប្បមញ្ញាយ, សាគរោ នាម សាវកោ;

មមុទ្ធរិតុកាមោ សោ, អាគច្ឆិ មម សន្តិកំ.

៧៥. ‘‘កិំ នុ សោចសិ មា ភាយិ, ចរ ធម្មំ សុមេធស;

អនុប្បទិន្នា ពុទ្ធេន, សព្ពេសំ ពីជសម្បទា.

៧៦. ‘‘សោ ចេ បូជេយ្យ សម្ពុទ្ធំ, តិដ្ឋន្តំ លោកនាយកំ;

ធាតុំ សាសបមត្តម្បិ, និព្ពុតស្សាបិ បូជយេ.

៧៧. ‘‘សមេ ចិត្តប្បសាទម្ហិ, សមំ បុញ្ញំ មហគ្គតំ;

តស្មា ថូបំ ករិត្វាន, បូជេហិ ជិនធាតុយោ.

៧៨. ‘‘សាគរស្ស វចោ សុត្វា, ពុទ្ធថូបំ អកាសហំ;

បញ្ចវស្សេ បរិចរិំ, មុនិនោ ថូបមុត្តមំ.

៧៩. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

សម្បត្តិំ អនុភោត្វាន, អរហត្តមបាបុណិំ.

៨០. ‘‘ភូរិបញ្ញា ច ចត្តារោ, សត្តកប្បសតេ ឥតោ;

សត្តរតនសម្បន្នា, ចក្កវត្តី មហព្ពលា.

៨១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បច្ចុបដ្ឋានសញ្ញកោ ថេរោ ឥមា គាថាយោ អភាសិត្ថាតិ.

បច្ចុបដ្ឋានសញ្ញកត្ថេរស្សាបទានំ នវមំ.