១០. ជាតិបូជកត្ថេរអបទានំ

៨២. ‘‘ជាយន្តស្ស វិបស្សិស្ស, អាលោកោ វិបុលោ អហុ;

បថវី ច បកម្បិត្ថ, សសាគរា សបព្ពតា.

៨៣. ‘‘នេមិត្តា ច វិយាកំសុ, ពុទ្ធោ លោកេ ភវិស្សតិ;

អគ្គោ ច សព្ពសត្តានំ, ជនតំ ឧទ្ធរិស្សតិ.

៨៤. ‘‘នេមិត្តានំ សុណិត្វាន, ជាតិបូជមកាសហំ;

ឯទិសា បូជនា នត្ថិ, យាទិសា ជាតិបូជនា.

៨៥. ‘‘សង្ខរិត្វាន [សំហរិត្វាន (សី. ស្យា.), សង្ករិត្វាន (ក.)]

កុសលំ, សកំ ចិត្តំ បសាទយិំ.

ជាតិបូជំ ករិត្វាន, តត្ថ កាលង្កតោ អហំ.

៨៦. ‘‘យំ យំ យោនុបបជ្ជាមិ, ទេវត្តំ អថ មានុសំ;

សព្ពេ សត្តេ អភិភោមិ, ជាតិបូជាយិទំ ផលំ.

៨៧. ‘‘ធាតិយោ មំ ឧបដ្ឋន្តិ, មម ចិត្តវសានុគា;

ន តា សក្កោន្តិ កោបេតុំ, ជាតិបូជាយិទំ ផលំ.

៨៨. ‘‘ឯកនវុតិតោ កប្បេ, យំ បូជមករិំ តទា;

ទុគ្គតិំ នាភិជានាមិ, ជាតិបូជាយិទំ ផលំ.

៨៩. ‘‘សុបារិចរិយា នាម, ចតុត្តិំស ជនាធិបា;

ឥតោ តតិយកប្បម្ហិ, ចក្កវត្តី មហព្ពលា.

៩០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ជាតិបូជកោ ថេរោ ឥមា គាថាយោ អភាសិត្ថាតិ.

ជាតិបូជកត្ថេរស្សាបទានំ ទសមំ.

មហាបរិវារវគ្គោ ទ្វាទសមោ.