៨. មគ្គសញ្ញកត្ថេរអបទានំ

៦៦. ‘‘បទុមុត្តរពុទ្ធស្ស, សាវកា វនចារិនោ;

វិប្បនដ្ឋា ព្រហារញ្ញេ, អន្ធាវ អនុសុយ្យរេ [អនុសុយរេ (សី.)].

៦៧. ‘‘អនុស្សរិត្វា សម្ពុទ្ធំ, បទុមុត្តរនាយកំ;

តស្ស តេ មុនិនោ បុត្តា, វិប្បនដ្ឋា មហាវនេ.

៦៨. ‘‘ភវនា ឱរុហិត្វាន, អគមិំ ភិក្ខុសន្តិកំ;

តេសំ មគ្គញ្ច អាចិក្ខិំ, ភោជនញ្ច អទាសហំ.

៦៩. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

ជាតិយា សត្តវស្សោហំ, អរហត្តមបាបុណិំ.

៧០. ‘‘សចក្ខូ នាម នាមេន, ទ្វាទស ចក្កវត្តិនោ;

សត្តរតនសម្បន្នា, បញ្ចកប្បសតេ ឥតោ.

៧១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មគ្គសញ្ញកោ ថេរោ ឥមា គាថាយោ អភាសិត្ថាតិ.

មគ្គសញ្ញកត្ថេរស្សាបទានំ អដ្ឋមំ.