រាជបច្ចត្ថិកាទិចតុក្កភេទកថា

៦៥. យស្មា បន ន ភិក្ខុបច្ចត្ថិកា ឯវ ឯវំ ករោន្តិ, រាជបច្ចត្ថិកាទយោបិ ករោន្តិ. តស្មា តម្បិ បភេទំ ទស្សេន្តោ ‘‘រាជបច្ចត្ថិកា’’តិអាទិមាហ. តត្ថ រាជានោ ឯវ បច្ចត្ថិកា រាជបច្ចត្ថិកា. តេ ច សយំ អានេន្តាបិ អញ្ញេហិ អាណាបេន្តាបិ អានេន្តិយេវាតិ វេទិតព្ពា. ចោរា ឯវ បច្ចត្ថិកា ចោរបច្ចត្ថិកា. ធុត្តាតិ មេថុនុបសំហិតខិឌ្ឌាបសុតា នាគរិកកេរាដិយបុរិសា, ឥត្ថិធុត្តសុរាធុត្តាទយោ វា; ធុត្តា ឯវ បច្ចត្ថិកា ធុត្តបច្ចត្ថិកា. គន្ធន្តិ ហទយំ វុច្ចតិ, តំ ឧប្បាដេន្តីតិ ឧប្បលគន្ធា, ឧប្បលគន្ធា ឯវ បច្ចត្ថិកា ឧប្បលគន្ធបច្ចត្ថិកា. ឯតេ កិរ ន កសិវណិជ្ជាទីហិ ជីវន្តិ, បន្ថឃាតគាមឃាតាទីនិ កត្វា បុត្តទារំ បោសេន្តិ. តេ កម្មសិទ្ធិំ បត្ថយមានា ទេវតានំ អាយាចេត្វា តាសំ ពលិកម្មត្ថំ មនុស្សានំ ហទយំ ឧប្បាដេន្តិ. សព្ពកាលេ ច មនុស្សា ទុល្លភា. ភិក្ខូ បន អរញ្ញេ វិហរន្តា សុលភា ហោន្តិ. តេ សីលវន្តំ ភិក្ខុំ គហេត្វា ‘‘សីលវតោ វធោ នាម ភារិយោ ហោតី’’តិ មញ្ញមានា តស្ស សីលវិនាសនត្ថំ មនុស្សិត្ថិអាទិកេ វា អានេន្តិ; តំ វា តត្ថ នេន្តិ. អយមេត្ថ វិសេសោ. សេសំ វុត្តនយេនេវ វេទិតព្ពំ. ភិក្ខុបច្ចត្ថិកវារេ វុត្តនយេនេវ ច ឥមេសុ ចតូសុបិ វារេសុ ចតុក្កានិ វេទិតព្ពានិ. បាឡិយំ បន សំខិត្តេន វុត្តានិ.

សព្ពាការេន ចតុក្កភេទកថា និដ្ឋិតា.