១០. ទសមសិក្ខាបទវណ្ណនា

១០៦២. ទសមេ – បសាខេតិ អធោកាយេ. អធោកាយោ ហិ យស្មា តតោ រុក្ខស្ស សាខា វិយ ឧភោ ឩរូ បភិជ្ជិត្វា គតា, តស្មា បសាខោតិ វុច្ចតិ.

១០៦៥. ភិន្ទាតិអាទីសុ សចេ ‘‘ភិន្ទ, ផាលេហី’’តិ សព្ពានិ អាណាបេតិ, សោ ច តថេវ ករោតិ, ឆ អាណត្តិទុក្កដានិ ឆ ច បាចិត្តិយានិ អាបជ្ជតិ. អថាបិ ឯវំ អាណាបេតិ – ‘‘ឧបាសក, យំកិញ្ចិ ឯត្ថ កាតព្ពំ, តំ សព្ពំ ករោហី’’តិ, សោ ច សព្ពានិបិ ភេទនាទីនិ ករោតិ; ឯកវាចាយ ឆ ទុក្កដានិ ឆ បាចិត្តិយានីតិ ទ្វាទស អាបត្តិយោ. សចេ បន ភេទនាទីសុបិ ឯកំយេវ វត្វា ‘‘ឥទំ ករោហី’’តិ អាណាបេតិ, សោ ច សព្ពានិ ករោតិ, យំ អាណត្តំ, តស្សេវ ករណេ បាចិត្តិយំ. សេសេសុ អនាបត្តិ. សេសំ ឧត្តានមេវ.

កថិនសមុដ្ឋានំ – កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

ទសមសិក្ខាបទំ.

អារាមវគ្គោ ឆដ្ឋោ.