១. បឋមសិក្ខាបទវណ្ណនា

៨៨៣-៦. នគ្គវគ្គស្ស បឋមសិក្ខាបទេ – ព្រហ្មចរិយំ ចិណ្ណេនាតិ ព្រហ្មចរិយេន ចិណ្ណេន; អថ វា ព្រហ្មចរិយស្ស ចរណេនាតិ; ឯវំ ករណត្ថេ វា សាមិអត្ថេ វា ឧបយោគវចនំ វេទិតព្ពំ. អច្ឆិន្នចីវរិកាយាតិ ឥទំ ឧទកសាដិកំ សន្ធាយ វុត្តំ, ន អញ្ញំ ចីវរំ. តស្មា ឧទកសាដិកាយ អច្ឆិន្នាយ វា នដ្ឋាយ វា នគ្គាយ ន្ហាយន្តិយា អនាបត្តិ. សចេបិ ឧទកសាដិកចីវរំ មហគ្ឃំ ហោតិ, ន សក្កា និវាសេត្វា ពហិ គន្តុំ, ឯវម្បិ នគ្គាយ ន្ហាយិតុំ វដ្ដតិ. សេសមេត្ថ ឧត្តានមេវ.

ឯឡកលោមសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, តិចិត្តំ, តិវេទនន្តិ.

បឋមសិក្ខាបទំ.