៩. នវមសិក្ខាបទវណ្ណនា

៨៧៥. នវមេ – អភិសបេយ្យាតិ សបថំ ករេយ្យ. និរយេន អភិសបតិ នាម ‘‘និរយេ និព្ពត្តាមិ, អវីចិម្ហិ និព្ពត្តាមិ, និរយេ និព្ពត្តតុ, អវីចិម្ហិ និព្ពត្តតូ’’តិ ឯវមាទិនា នយេន អក្កោសតិ. ព្រហ្មចរិយេន អភិសបតិ នាម ‘‘គិហិនី ហោមិ, ឱទាតវត្ថា ហោមិ, បរិព្ពាជិកា ហោមិ, ឥតរា វា ឯទិសា ហោតូ’’តិ ឯវមាទិនា នយេន អក្កោសតិ; វាចាយ វាចាយ បាចិត្តិយំ. ឋបេត្វា បន និរយញ្ច ព្រហ្មចរិយញ្ច ‘‘សុនខី សូករី កាណា កុណី’’តិអាទិនា នយេន អក្កោសន្តិយា វាចាយ វាចាយ ទុក្កដំ.

៨៧៨. អត្ថបុរេក្ខារាយាតិ អដ្ឋកថំ កថេន្តិយា. ធម្មបុរេក្ខារាយាតិ បាឡិំ វាចេន្តិយា. អនុសាសនិបុរេក្ខារាយាតិ ‘‘ឥទានិបិ ត្វំ ឯទិសា, សាធុ វិរមស្សុ, នោ ចេ វិរមសិ, អទ្ធា បុន ឯវរូបានិ កម្មានិ កត្វា និរយេ ឧប្បជ្ជិស្សសិ, តិរច្ឆានយោនិយា ឧប្បជ្ជិស្សសី’’តិ ឯវំ អនុសាសនិយំ ឋត្វា វទន្តិយា អនាបត្តិ. សេសំ ឧត្តានមេវ.

តិសមុដ្ឋានំ – កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, ទុក្ខវេទនន្តិ.

នវមសិក្ខាបទំ.