៥. បញ្ចមសិក្ខាបទវណ្ណនា

៨៥៤. បញ្ចមេ – ឃរំ សោធេន្តាតិ តេសំ កិរ ឯតទហោសិ – ‘‘ថេរិយា កោចិ កាយិកវាចសិកោ វីតិក្កមោ ន ទិស្សតិ, ឃរម្បិ តាវ សោធេមា’’តិ, តតោ ឃរំ សោធេន្តា នំ អទ្ទសំសុ.

៨៥៦. អនោវស្សកំ អតិក្កាមេន្តិយាតិ បឋមំ បាទំ អតិក្កាមេន្តិយា ទុក្កដំ, ទុតិយំ អតិក្កាមេន្តិយា បាចិត្តិយំ, ឧបចារាតិក្កមេ ឯសេវ នយោ.

៨៥៨. គិលានាយាតិ យា តាទិសេន គេលញ្ញេន អាបុច្ឆិតុំ ន សក្កោតិ. អាបទាសូតិ ឃរេ អគ្គិ វា ឧដ្ឋិតោ ហោតិ, ចោរា វា; ឯវរូបេ ឧបទ្ទវេ អនាបុច្ឆា បក្កមតិ, អនាបត្តិ. សេសមេត្ថ ឧត្តានមេវ.

កថិនសមុដ្ឋានំ – កាយវាចតោ កាយវាចាចិត្តតោ ច សមុដ្ឋាតិ, កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

បញ្ចមសិក្ខាបទំ.