៤. ចតុត្ថសង្ឃាទិសេសសិក្ខាបទវណ្ណនា

៦៩៤-៨. ចតុត្ថេ – បាទបីឋំ នាម ធោតបាទដ្ឋបនកំ. បាទកឋលិកា នាម អធោតបាទដ្ឋបនកំ. អនញ្ញាយ គណស្ស ឆន្ទន្តិ តស្សេវ ការកគណស្ស ឆន្ទំ អជានិត្វា. វត្តេ វត្តន្តិន្តិ តេចត្តាលីសប្បភេទេ នេត្ថារវត្តេ វត្តមានំ. សេសំ ឧត្តានមេវ.

ធុរនិក្ខេបសមុដ្ឋានំ – កាយវាចាចិត្តតោ សមុដ្ឋាតិ, កិរិយាកិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, ទុក្ខវេទនន្តិ.

ចតុត្ថសិក្ខាបទំ.