៨. កណ្ឌុបដិច្ឆាទិសិក្ខាបទវណ្ណនា

៥៣៧. អដ្ឋមេ – កណ្ឌុបដិច្ឆាទិ អនុញ្ញាតា ហោតីតិ កត្ថ អនុញ្ញាតា? ចីវរក្ខន្ធកេ ពេលដ្ឋសីសវត្ថុស្មិំ. វុត្តញ្ហិ តត្ថ – ‘‘អនុជានាមិ, ភិក្ខវេ, យស្ស កណ្ឌុ វា បិឡកា វា អស្សាវោ វា ថុល្លកច្ឆុ វា អាពាធោ តស្ស កណ្ឌុបដិច្ឆាទិ’’ន្តិ (មហាវ. ៣៥៤).

៥៣៩. យស្ស អធោនាភិ ឧព្ភជាណុមណ្ឌលន្តិ យស្ស ភិក្ខុនោ នាភិយា ហេដ្ឋា ជាណុមណ្ឌលានំ ឧបរិ. កណ្ឌូតិ កច្ឆុ. បិឡកាតិ លោហិតតុណ្ឌិកា សុខុមបិឡកា. អស្សាវោតិ អរិសភគន្ទរមធុមេហាទីនំ វសេន អសុចិបគ្ឃរណកំ. ថុល្លកច្ឆុ វា អាពាធោតិ មហាបិឡកាពាធោ វុច្ចតិ. សេសមេត្ថ ឧត្តានមេវ. ឆសមុដ្ឋានំ.

កណ្ឌុបដិច្ឆាទិសិក្ខាបទំ អដ្ឋមំ.