៦. ថេយ្យសត្ថសិក្ខាបទវណ្ណនា

៤០៧. ឆដ្ឋេ – បដិយាលោកន្តិ សូរិយាលោកស្ស បដិមុខំ; បច្ឆិមទិសន្តិ អត្ថោ. កម្មិយាតិ សុង្កដ្ឋានេ កម្មិកា.

៤០៩. រាជានំ វា ថេយ្យំ គច្ឆន្តីតិ រាជានំ វា ថេនេត្វា វញ្ចេត្វា រញ្ញោ សន្តកំ កិញ្ចិ គហេត្វា ឥទានិ ន តស្ស ទស្សាមាតិ គច្ឆន្តិ.

៤១១. វិសង្កេតេនាតិ កាលវិសង្កេតេន ទិវសវិសង្កេតេន ច គច្ឆតោ អនាបត្តិ. មគ្គវិសង្កេតេន បន អដវិវិសង្កេតេន វា អាបត្តិយេវ. សេសមេត្ថ ភិក្ខុនិវគ្គេ វុត្តនយត្តា ឧត្តានត្ថមេវ. ថេយ្យសត្ថសមុដ្ឋានំ – កាយចិត្តតោ កាយវាចាចិត្តតោ ច សមុដ្ឋាតិ, កិរិយំ, សញ្ញាវិមោក្ខំ, សចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

ថេយ្យសត្ថសិក្ខាបទំ ឆដ្ឋំ.