៩. វិកប្បនសិក្ខាបទវណ្ណនា

៣៧៤. នវមេ – តស្ស វា អទិន្នន្តិ ចីវរសាមិកស្ស ‘‘បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ ឯវំ វត្វា អទិន្នំ. តស្ស វា អវិស្សសន្តោតិ យេន វិនយកម្មំ កតំ, តស្ស អវិស្សាសេន វា. តេន បន ទិន្នំ វា តស្ស វិស្សាសេន វា បរិភុញ្ជន្តស្ស អនាបត្តិ. សេសមេត្ថ តិំសកវណ្ណនាយំ វុត្តនយត្តា ឧត្តានមេវាតិ. កថិនសមុដ្ឋានំ – កាយវាចតោ កាយវាចាចិត្តតោ ច សមុដ្ឋាតិ, កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

វិកប្បនសិក្ខាបទំ នវមំ.