៧. នហានសិក្ខាបទវណ្ណនា

៣៦៤. សត្តមេ – ចុណ្ណេន វា មត្តិកាយ វាតិ ឯត្ថ ចុណ្ណមត្តិកានំ អភិសង្ខរណកាលតោ បដ្ឋាយ សព្ពបយោគេសុ ទុក្កដំ.

៣៦៦. បារំ គច្ឆន្តោ ន្ហាយតីតិ ឯត្ថ សុក្ខាយ នទិយា វាលិកំ ឧក្កិរិត្វា កតអាវាដកេសុបិ ន្ហាយិតុំ វដ្ដតិ. អាបទាសូតិ ភមរាទីហិ អនុពទ្ធស្ស ឧទកេ និមុជ្ជិតុំ វដ្ដតីតិ. សេសមេត្ថ ឧត្តានមេវ. ឯឡកលោមសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, តិចិត្តំ, តិវេទនន្តិ.

នហានសិក្ខាបទំ សត្តមំ.