៤. មោគ្គល្លានសុត្តវណ្ណនា

៨២៦. ចតុត្ថេ ឧទ្ធតាតិ ឧទ្ធច្ចបកតិកា វិប្ផន្ទមានចិត្តា. ឧទ្ធច្ចេន ហិ ឯការម្មណេ ចិត្តំ វិប្ផន្ទតិ ធជយដ្ឋិយំ វាតេន បហតធជោ វិយ. ឧន្នឡាតិ ឧគ្គតនឡា, ឧដ្ឋិតតុច្ឆមានាតិ វុត្តំ ហោតិ. ចបលាតិ បត្តចីវរមណ្ឌនាទិចាបល្លេន យុត្តា. មុខរាតិ មុខខរា, ខរវចនាតិ វុត្តំ ហោតិ. វិកិណ្ណវាចាតិ អសំយតវចនា ទិវសម្បិ និរត្ថកវចនប្បលាបិនោ. មុដ្ឋស្សតីតិ នដ្ឋស្សតិនោ. អសម្បជានាតិ បញ្ញារហិតា. អសមាហិតាតិ ឧបចារប្បនាសមាធិវិរហិតា. ភន្តចិត្តាតិ ឧព្ភន្តចិត្តា សមាធិវិរហេន លទ្ធោកាសេន ឧទ្ធច្ចេន. បាកតិន្ទ្រិយាតិ អសំវុតិន្ទ្រិយា. ឥទ្ធាភិសង្ខារន្តិ អាបោកសិណំ សមាបជ្ជិត្វា វុដ្ឋាយ បាសាទបតិដ្ឋិតំ បថវិភាគំ ‘‘ឧទក’’ន្តិ អធិដ្ឋាយ, ឧទកបិដ្ឋេ ឋិតបាសាទំ វេហាសំ អព្ភុគ្គន្ត្វា អង្គុដ្ឋកេន បហរិ. គម្ភីរនេមោតិ គម្ភីរអាវាដោ, គម្ភីរភូមិភាគំ អនុបវិដ្ឋោតិ អត្ថោ. សុនិខាតោតិ សុដ្ឋុ និខាតោ, កោដ្ដេត្វា សុដ្ឋុ ឋបិតោ. ឥធ អភិញ្ញាបាទកិទ្ធិ កថិតា.