៩-១០. បឋមវិភង្គសុត្តាទិវណ្ណនា

៤៧៩-៤៨០. នវមេ សតិនេបក្កេនាតិ ឯត្ថ និបកស្ស ភាវោ នេបក្កំ, បញ្ញាយេតំ នាមំ. កស្មា បន សតិភាជនេ បញ្ញា វុត្តាតិ? សតិយា ពលវភាវទស្សនត្ថំ. ពលវសតិ ហិ ឥធ អធិប្បេតា. សា ច បញ្ញាសម្បយុត្តាវ ពលវតី ហោតិ, ន វិប្បយុត្តាតិ បញ្ញាសម្បយុត្តសតិំ ទស្សេន្តោ ឯវមាហ. ចិរកតន្តិ ចិរកាលំ កតំ ទានំ វា សីលំ វា ឧបោសថកម្មំ វា. ចិរភាសិតន្តិ ‘‘អសុកស្មិំ ឋានេ អសុកំ នាម ភាសិត’’ន្តិ ឯវំ ចិរកាលេ ភាសិតំ. វោស្សគ្គារម្មណំ កត្វាតិ និព្ពានារម្មណំ កត្វា. ឧទយត្ថគាមិនិយាតិ ឧទយញ្ច អត្ថញ្ច គច្ឆន្តិយា, ឧទយព្ពយបរិគ្គហិកាយាតិ អត្ថោ. ឥមស្មិំ សុត្តេ សទ្ធាសតិបញ្ញិន្ទ្រិយានិ បុព្ពភាគានិ, វីរិយិន្ទ្រិយំ មិស្សកំ, សមាធិន្ទ្រិយំ និព្ពត្តិតលោកុត្តរមេវ កថិតំ. ទសមេបិ អយមេវ ធម្មបរិច្ឆេទោតិ.

សុទ្ធិកវគ្គោ បឋមោ.