១-២. បឋមមហានាមសុត្តាទិវណ្ណនា

១០១៧-១៨. តតិយស្ស បឋមេ ឥទ្ធន្តិ តេលមធុផាណិតាទីហិ សមិទ្ធំ. ផីតន្តិ ហត្ថូបគសីសូបគគីវូបគាទិអលង្ការវសេន សុបុប្ផិតំ. អាកិណ្ណមនុស្សន្តិ និរន្តរមនុស្សំ. សម្ពាធព្យូហន្តិ ព្យូហា វុច្ចន្តិ អវិនិព្ពិទ្ធរច្ឆាយោ, យា បវិដ្ឋមគ្គេនេវ និគ្គច្ឆន្តិ, តា សម្ពាធា ព្យូហា ពហុកា ឯត្ថាតិ សម្ពាធព្យូហំ. ឥមិនាបិ នគរស្ស ឃនវាសមេវ ទីបេតិ. ភន្តេនាតិ ឥតោ ចិតោ ច បរិព្ភមន្តេន ឧទ្ធតចារិនា. ទុតិយំ ឧត្តានមេវ.