៣-៥. យោធាជីវសុត្តាទិវណ្ណនា

៣៥៥-៣៥៧. តតិយេ យោធាជីវោតិ យុទ្ធេន ជីវិកំ កប្បនកោ ធម្មសង្គាហកត្ថេរេហិ ឯវំ គហិតនាមោ. ឧស្សហតិ វាយមតីតិ ឧស្សាហំ វាយាមំ ករោតិ. បរិយាបាទេន្តីតិ មរណំ បដិបជ្ជាបេន្តិ. ទុក្កដន្តិ ទុដ្ឋុ កតំ. ទុប្បណិហិតន្តិ ទុដ្ឋុ ឋបិតំ. បរជិតោ នាម និរយោតិ អយម្បិ ន វិសុំ ឯកោ និរយោ, អវីចិស្សេវ បន ឯកស្មិំ កោដ្ឋាសេ បញ្ចាវុធសន្នទ្ធា ផលកហត្ថា ហត្ថិអស្សរថេ អារុយ្ហ សង្គាមេ យុជ្ឈន្តា វិយ បច្ចន្តិ, តំ សន្ធាយេតំ វុត្តំ. ចតុត្ថបញ្ចមេសុបិ ឯសេវ នយោ.