១. សំយោជនសុត្តវណ្ណនា

៣៤៣. ចិត្តសំយុត្តស្ស បឋមេ មច្ឆិកាសណ្ឌេតិ ឯវំនាមកេ វនសណ្ឌេ. អយមន្តរាកថា ឧទបាទីតិ បោរាណកត្ថេរា អតិរច្ឆានកថា ហោន្តិ, និសិន្ននិសិន្នដ្ឋានេ បញ្ហំ សមុដ្ឋាបេត្វា អជានន្តា បុច្ឆន្តិ, ជានន្តា វិស្សជ្ជេន្តិ, តេន នេសំ អយំ កថា ឧទបាទិ. មិគបថកន្តិ ឯវំនាមកំ អត្តនោ ភោគគាមំ. សោ កិរ អម្ពាដការាមស្ស បិដ្ឋិភាគេ ហោតិ. តេនុបសង្កមីតិ ‘‘ថេរានំ បញ្ហំ វិស្សជ្ជេត្វា ផាសុវិហារំ កត្វា ទស្សាមី’’តិ ចិន្តេត្វា ឧបសង្កមិ. គម្ភីរេ ពុទ្ធវចនេតិ អត្ថគម្ភីរេ ចេវ ធម្មគម្ភីរេ ច ពុទ្ធវចនេ. បញ្ញាចក្ខុ កមតីតិ ញាណចក្ខុ វហតិ បវត្តតិ.