២-១០. បសយ្ហសុត្តាទិវណ្ណនា

៣០៥-៣១៣. បសយ្ហាតិ អភិភវិត្វា. អភិភុយ្យ វត្តតីតិ អភិភវតិ អជ្ឈោត្ថរតិ. នេវ រូបពលំ តាយតីតិ នេវ រូបពលំ តាយិតុំ រក្ខិតុំ សក្កោតិ. នាសេន្តេវ នំ, កុលេ ន វាសេន្តីតិ ‘‘ទុស្សីលា សំភិន្នាចារា អតិក្កន្តមរិយាទា’’តិ គីវាយំ គហេត្វា នីហរន្តិ, ន តស្មិំ កុលេ វាសេន្តិ. វាសេន្តេវ នំ កុលេ, ន នាសេន្តីតិ ‘‘កិំ រូបេន ភោគាទីហិ វា, បរិសុទ្ធសីលា ឯសា អាចារសម្បន្នា’’តិ ញត្វា ញាតកា តស្មិំ កុលេ វាសេន្តិយេវ, ន នាសេន្តិ. សេសំ សព្ពត្ថ ឧត្តានត្ថមេវាតិ.

មាតុគាមសំយុត្តវណ្ណនា និដ្ឋិតា.