១. រហោគតសុត្តវណ្ណនា

២៥៩. រហោគតវគ្គស្ស បឋមេ យំ កិញ្ចិ វេទយិតំ, តំ ទុក្ខស្មិន្តិ យំ កិញ្ចិ វេទយិតំ, តំ សព្ពំ ទុក្ខន្តិ អត្ថោ. សង្ខារានំយេវ អនិច្ចតន្តិអាទីសុ យា ឯសា សង្ខារានំ អនិច្ចតា ខយធម្មតា វយធម្មតា វិបរិណាមធម្មតា, ឯតំ សន្ធាយ យំ កិញ្ចិ វេទយិតំ, តំ ទុក្ខន្តិ មយា ភាសិតន្តិ ទីបេតិ. យា ហិ សង្ខារានំ អនិច្ចតា, វេទនានម្បិ សា អនិច្ចតា ឯវ. អនិច្ចតា ច នាមេសា មរណំ, មរណតោ ឧត្តរិ ទុក្ខំ នាម នត្ថីតិ ឥមិនា អធិប្បាយេន សព្ពា វេទនា ទុក្ខាតិ វុត្តា. អថ ខោ បន ភិក្ខុ មយាតិ ឥទំ ន កេវលំ អហំ វេទនានំយេវ និរោធំ បញ្ញាបេមិ, ឥមេសម្បិ ធម្មានំ និរោធំ បញ្ញាបេមីតិ ទស្សនត្ថំ អារទ្ធំ. វូបសមោ ច បស្សទ្ធិយោ ច ឯវរូបាយ ទេសនាយ ពុជ្ឈនកានំ អជ្ឈាសយេន វុត្តា. សញ្ញាវេទយិតនិរោធគ្គហណេន ចេត្ថ ចត្តារោ អារុប្បា គហិតាវ ហោន្តីតិ វេទិតព្ពា.