៨. ឧបវាណសន្ទិដ្ឋិកសុត្តវណ្ណនា

៧០. អដ្ឋមេ រូបប្បដិសំវេទីតិ នីលបីតាទិភេទំ អារម្មណំ វវត្ថាបេន្តោ រូបំ បដិសំវិទិតំ ករោតិ, តស្មា រូបប្បដិសំវេទី នាម ហោតិ. រូបរាគប្បដិសំវេទីតិ កិលេសស្ស អត្ថិភាវេនេវ បន រូបរាគំ បដិសំវិទិតំ ករោតិ នាម, តស្មា រូបរាគប្បដិសំវេទីតិ វុច្ចតិ. សន្ទិដ្ឋិកោតិអាទីនិ វិសុទ្ធិមគ្គេ វុត្តត្ថានេវ. នោ ច រូបរាគប្បដិសំវេទីតិ កិលេសស្ស នត្ថិភាវេនេវ ន រូបរាគំ បដិសំវិទិតំ ករោតិ នាម, តស្មា ‘‘នោ ច រូបរាគប្បដិសំវេទី’’តិ វុច្ចតិ. ឥមស្មិំ សុត្តេ សេខាសេខានំ បច្ចវេក្ខណា កថិតា.