២-៣. ទុតិយសមុទ្ទសុត្តាទិវណ្ណនា

២២៩-២៣០. ទុតិយេ សមុទ្ទោតិ សមុទ្ទនដ្ឋេន សមុទ្ទោ, កិលេទនដ្ឋេន តេមនដ្ឋេនាតិ វុត្តំ ហោតិ. យេភុយ្យេនាតិ ឋបេត្វា អរិយសាវកេ. សមុន្នាតិ កិលិន្នា តិន្តា និមុគ្គា. តន្តាកុលកជាតាតិអាទិ ហេដ្ឋា វិត្ថារិតមេវ. មច្ចុជហោតិ តយោ មច្ចូ ជហិត្វា ឋិតោ. និរុបធីតិ តីហិ ឧបធីហិ អនុបធិ. អបុនព្ភវាយាតិ និព្ពានត្ថាយ. អមោហយី មច្ចុរាជន្តិ យថា តស្ស គតិំ ន ជានាតិ, ឯវំ មច្ចុរាជានំ មោហេត្វា គតោ. តតិយំ វុត្តនយមេវ.