៧-៨. ហាលិទ្ទិកានិសុត្តាទិវណ្ណនា

១៣០-១៣១. សត្តមេ មនាបំ ឥត្ថេតន្តិ បជានាតីតិ យំ អនេន មនាបំ រូបំ ទិដ្ឋំ, តំ ឥត្ថេតន្តិ ឯវមេតំ មនាបមេវ តន្តិ បជានាតិ. ចក្ខុវិញ្ញាណំ សុខវេទនិយញ្ច ផស្សំ បដិច្ចាតិ ចក្ខុវិញ្ញាណញ្ចេវ, យោ ច ឧបនិស្សយកោដិយា វា អនន្តរកោដិយា វា សមនន្តរកោដិយា វា សម្បយុត្តកោដិយា វា សុខវេទនាយ បច្ចយោ ផស្សោ, តំ សុខវេទនិយំ ផស្សញ្ច បដិច្ច ឧប្បជ្ជតិ សុខវេទនាតិ. ឯស នយោ សព្ពត្ថ. ឥតិ ឥមេសុ ទ្វីសុ សុត្តេសុ កិរិយាមនោវិញ្ញាណធាតុ អាវជ្ជនកិច្ចា, មនោធាតុយេវ វា សមានា មនោធាតុនាមេន វុត្តាតិ វេទិតព្ពា. អដ្ឋមំ ឧត្តានមេវ.