១១. យោគក្ខេមិវគ្គោ

១. យោគក្ខេមិសុត្តវណ្ណនា

១០៤. យោគក្ខេមិវគ្គស្ស បឋមេ យោគក្ខេមិបរិយាយន្តិ ចតូហិ យោគេហិ ខេមិនោ ការណភូតំ. ធម្មបរិយាយន្តិ ធម្មការណំ. អក្ខាសិ យោគន្តិ យុត្តិំ កថេសិ. តស្មាតិ កស្មា? កិំ អក្ខាតត្តា, ឧទាហុ បហីនត្តាតិ? បហីនត្តា. ន ហិ អក្ខានេន យោគក្ខេមិ នាម ហោតិ.

២-១០. ឧបាទាយសុត្តាទិវណ្ណនា

១០៥-១១៣. ទុតិយេ វេទនាសុខទុក្ខំ កថិតំ, តំ បន វិបាកសុខទុក្ខំ វដ្ដតិ. តតិយេ ទុក្ខស្សាតិ វដ្ដទុក្ខស្ស. ចតុត្ថេ លោកស្សាតិ សង្ខារលោកស្ស. បញ្ចមាទីសុ យំ វត្តព្ពំ សិយា, តំ ខន្ធិយវគ្គេ វុត្តនយមេវ.

យោគក្ខេមិវគ្គោ ឯកាទសមោ.