៣. បរិហានធម្មសុត្តវណ្ណនា

៩៦. តតិយេ បរិហានធម្មន្តិ បរិហានសភាវំ. អភិភាយតនានីតិ អភិភវិតានិ អាយតនានិ. សរសង្កប្បាតិ ឯត្ថ សរន្តីតិ សរា, ធាវន្តីតិ អត្ថោ. សរា ច តេ សង្កប្បា ច សរសង្កប្បា. សំយោជនិយាតិ ពន្ធនិយា ពន្ធនស្ស បច្ចយភូតា. តញ្ចេ ភិក្ខូតិ តំ ឯវំ ឧប្បន្នំ កិលេសជាតំ, តំ វា អារម្មណំ. អធិវាសេតីតិ ចិត្តេ អារោបេត្វា វាសេតិ. នប្បជហតីតិ ឆន្ទរាគប្បហានេន ន បជហតិ. ឯវំ សព្ពបទេហិ យោជេតព្ពំ. អភិភាយតនញ្ហេតំ វុត្តំ ភគវតាតិ ឯតំ ពុទ្ធេន ភគវតា អភិភវិតំ អាយតនន្តិ កថិតំ. ឥធ ធម្មំ បុច្ឆិត្វា វិភជន្តេន បុគ្គលេន ធម្មោ ទស្សិតោ.