៤. អនុរាធសុត្តវណ្ណនា

៨៦. ចតុត្ថេ អរញ្ញកុដិកាយន្តិ តស្សេវ វិហារស្ស បច្ចន្តេ បណ្ណសាលាយំ. តំ តថាគតោតិ តុម្ហាកំ សត្ថា តថាគតោ តំ សត្តំ តថាគតំ. អញ្ញត្រ ឥមេហីតិ តស្ស កិរ ឯវំ អហោសិ ‘‘ឥមេ សាសនស្ស បដិបក្ខា បដិវិលោមា, យថា ឥមេ ភណន្តិ, ន ឯវំ សត្ថា បញ្ញាបេស្សតិ, អញ្ញថា បញ្ញាបេស្សតី’’តិ. តស្មា ឯវមាហ. ឯវំ វុត្តេ តេ អញ្ញតិត្ថិយាតិ ឯវំ ថេរេន អត្តនោ ច បរេសញ្ច សមយំ អជានិត្វា វុត្តេ ឯកទេសេន សាសនសមយំ ជានន្តា ថេរស្ស វាទេ ទោសំ ទាតុកាមា តេ អញ្ញតិត្ថិយា បរិព្ពាជកា អាយស្មន្តំ អនុរាធំ ឯតទវោចុំ.

តំ កិំ មញ្ញសិ អនុរាធាតិ សត្ថា តស្ស កថំ សុត្វា ចិន្តេសិ – ‘‘អយំ ភិក្ខុ អត្តនោ លទ្ធិយំ ទោសំ ន ជានាតិ, ការកោ បនេស យុត្តយោគោ, ធម្មទេសនាយ ឯវ នំ ជានាបេស្សាមី’’តិ តិបរិវដ្ដំ ទេសនំ ទេសេតុកាមោ ‘‘តំ កិំ មញ្ញសិ, អនុរាធា’’តិអាទិមាហ. អថស្ស តាយ ទេសនាយ អរហត្តប្បត្តស្ស អនុយោគវត្តំ អារោបេន្តោ តំ កិំ មញ្ញសិ, អនុរាធ? រូបំ តថាគតោតិអាទិមាហ. ទុក្ខញ្ចេវ បញ្ញបេមិ, ទុក្ខស្ស ច និរោធន្តិ វដ្ដទុក្ខញ្ចេវ វដ្ដទុក្ខស្ស ច និរោធំ និព្ពានំ បញ្ញបេមិ. ទុក្ខន្តិ វា វចនេន ទុក្ខសច្ចំ គហិតំ. តស្មិំ គហិតេ សមុទយសច្ចំ គហិតមេវ ហោតិ, តស្ស មូលត្តា. និរោធន្តិ វចនេន និរោធសច្ចំ គហិតំ. តស្មិំ គហិតេ មគ្គសច្ចំ គហិតមេវ ហោតិ តស្ស ឧបាយត្តា. ឥតិ បុព្ពេ ចាហំ, អនុរាធ, ឯតរហិ ច ចតុសច្ចមេវ បញ្ញបេមីតិ ទស្សេតិ. ឯវំ ឥមស្មិំ សុត្តេ វដ្ដវិវដ្ដមេវ កថិតំ. ចតុត្ថំ.