៤. ឧបាទានបរិបវត្តសុត្តវណ្ណនា

៥៦. ចតុត្ថេ ចតុបរិវដ្ដន្តិ ឯកេកស្មិំ ខន្ធេ ចតុន្នំ បរិវដ្ដនវសេន. រូបំ អព្ភញ្ញាសិន្តិ រូបំ ទុក្ខសច្ចន្តិ អភិញ្ញាសិំ. ឯវំ សព្ពបទេសុ ចតុសច្ចវសេនេវ អត្ថោ វេទិតព្ពោ. អាហារសមុទយាតិ ឯត្ថ សច្ឆន្ទរាគោ កពឡីការាហារោ អាហារោ នាម. បដិបន្នាតិ សីលតោ បដ្ឋាយ យាវ អរហត្តមគ្គា បដិបន្នា ហោន្តិ. គាធន្តីតិ បតិដ្ឋហន្តិ. ឯត្តាវតា សេក្ខភូមិំ កថេត្វា ឥទានិ អសេក្ខភូមិំ កថេន្តោ យេ ច ខោ កេចិ, ភិក្ខវេតិអាទិមាហ. សុវិមុត្តាតិ អរហត្តផលវិមុត្តិយា សុដ្ឋុ វិមុត្តា. កេវលិនោតិ សកលិនោ កតសព្ពកិច្ចា. វដ្ដំ តេសំ នត្ថិ បញ្ញាបនាយាតិ យេន តេ អវសិដ្ឋេន វដ្ដេន បញ្ញាបេយ្យុំ, តំ នេសំ វដ្ដំ នត្ថិ បញ្ញាបនាយ. អថ វា វដ្ដន្តិ ការណំ, បញ្ញាបនាយ ការណំ នត្ថីតិ. ឯត្តាវតា អសេក្ខភូមិវារោ កថិតោ. ចតុត្ថំ.