១. ឧបយសុត្តវណ្ណនា

៥៣. ឧបយវគ្គស្ស បឋមេ ឧបយោតិ តណ្ហាមានទិដ្ឋិវសេន បញ្ចក្ខន្ធេ ឧបគតោ. វិញ្ញាណន្តិ កម្មវិញ្ញាណំ. អាបជ្ជេយ្យាតិ កម្មំ ជវាបេត្វា បដិសន្ធិអាកឌ្ឍនសមត្ថតាយ វុទ្ធិអាទីនិ អាបជ្ជេយ្យ. វិញ្ញាណុបយន្តិ បទស្ស អគ្គហណេ ការណំ វុត្តមេវ. វោច្ឆិជ្ជតារម្មណន្តិ បដិសន្ធិអាកឌ្ឍនសមត្ថតាយ អភាវេន អារម្មណំ វោច្ឆិជ្ជតិ. បតិដ្ឋា វិញ្ញាណស្សាតិ កម្មវិញ្ញាណស្ស បតិដ្ឋា ន ហោតិ. តទប្បតិដ្ឋិតន្តិ តំ អប្បតិដ្ឋិតំ. អនភិសង្ខច្ច វិមុត្តន្តិ បដិសន្ធិំ អនភិសង្ខរិត្វា វិមុត្តំ. បឋមំ.