៦. ខន្ធសុត្តវណ្ណនា

៤៨. ឆដ្ឋេ រូបក្ខន្ធោ កាមាវចរោ, ចត្តារោ ខន្ធា ចតុភូមកា. សាសវន្តិ អាសវានំ អារម្មណភាវេន បច្ចយភូតំ. ឧបាទានិយន្តិ តថេវ ច ឧបាទានានំ បច្ចយភូតំ. វចនត្ថោ បនេត្ថ – អារម្មណំ កត្វា បវត្តេហិ សហ អាសវេហីតិ សាសវំ. ឧបាទាតព្ពន្តិ ឧបាទានិយំ. ឥធាបិ រូបក្ខន្ធោ កាមាវចរោ, អវសេសា តេភូមកា វិបស្សនាចារវសេន វុត្តា. ឯវមេត្ថ រូបំ រាសដ្ឋេន ខន្ធេសុ បវិដ្ឋំ, សាសវរាសដ្ឋេន ឧបាទានក្ខន្ធេសុ. វេទនាទយោ សាសវាបិ អត្ថិ, អនាសវាបិ អត្ថិ. តេ រាសដ្ឋេន សព្ពេបិ ខន្ធេសុ បវិដ្ឋា, តេភូមកា បនេត្ថ សាសវដ្ឋេន ឧបាទានក្ខន្ធេសុ បវិដ្ឋាតិ. ឆដ្ឋំ.