៤. ទុតិយអនិច្ចសុត្តវណ្ណនា

៤៦. ចតុត្ថេ បុព្ពន្តានុទិដ្ឋិយោតិ បុព្ពន្តំ អនុគតា អដ្ឋារស ទិដ្ឋិយោ ន ហោន្តិ. អបរន្តានុទិដ្ឋិយោតិ អបរន្តំ អនុគតា ចតុចត្តាលីស ទិដ្ឋិយោ ន ហោន្តិ. ថាមសោ បរាមាសោតិ ទិដ្ឋិថាមសោ ចេវ ទិដ្ឋិបរាមាសោ ច ន ហោតិ. ឯត្តាវតា បឋមមគ្គោ ទស្សិតោ. ឥទានិ សហ វិបស្សនាយ តយោ មគ្គេ ច ផលានិ ច ទស្សេតុំ រូបស្មិន្តិអាទិ អារទ្ធំ. អថ វា ទិដ្ឋិយោ នាម វិបស្សនាយ ឯវ បហីនា, ឥទំ បន ឧបរិ សហ វិបស្សនាយ ចត្តារោ មគ្គេ ទស្សេតុំ អារទ្ធំ. ចតុត្ថំ.