៣. ភារវគ្គោ

១. ភារសុត្តវណ្ណនា

២២. ភារវគ្គស្ស បឋមេ បញ្ចុបាទានក្ខន្ធាតិស្ស វចនីយន្តិ បញ្ចុបាទានក្ខន្ធា ឥតិ អស្ស វចនីយំ, ឯវំ វត្តព្ពំ ភវេយ្យាតិ អត្ថោ. អយំ វុច្ចតិ, ភិក្ខវេ, ភារោតិ យេ ឥមេ បញ្ចុបាទានក្ខន្ធា, អយំ ភារោតិ វុច្ចតិ. កេនដ្ឋេនាតិ? បរិហារភារិយដ្ឋេន. ឯតេសញ្ហិ ឋាបនគមននិសីទាបននិបជ្ជាបនន្ហាបនមណ្ឌនខាទាបនភុញ្ជាបនាទិបរិហារោ ភារិយោតិ បរិហារភារិយដ្ឋេន ភារោតិ វុច្ចតិ. ឯវំនាមោតិ តិស្សោ ទត្តោតិអាទិនាមោ. ឯវំគោត្តោតិ កណ្ហាយនោ វច្ឆាយនោតិអាទិគោត្តោ. ឥតិ វោហារមត្តសិទ្ធំ បុគ្គលំ ‘‘ភារហារោ’’តិ កត្វា ទស្សេតិ. បុគ្គលោ ហិ បដិសន្ធិក្ខណេយេវ ខន្ធភារំ ឧក្ខិបិត្វា ទសបិ វស្សានិ វីសតិបិ វស្សសតម្បីតិ យាវជីវំ ឥមំ ខន្ធភារំ ន្ហាបេន្តោ ភោជេន្តោ មុទុសម្ផស្សមញ្ចបីឋេសុ និសីទាបេន្តោ និបជ្ជាបេន្តោ បរិហរិត្វា ចុតិក្ខណេ ឆឌ្ឌេត្វា បុន បដិសន្ធិក្ខណេ អបរំ ខន្ធភារំ អាទិយតិ, តស្មា ភារហារោតិ ជាតោ.

បោនោភវិកាតិ បុនព្ភវនិព្ពត្តិកា. នន្ទីរាគសហគតាតិ នន្ទិរាគេន សហ ឯកត្តមេវ គតា. តព្ភាវសហគតញ្ហិ ឥធ អធិប្បេតំ. តត្រ តត្រាភិនន្ទិនីតិ ឧបបត្តិដ្ឋានេ វា រូបាទីសុ វា អារម្មណេសុ តត្ថ តត្ថ អភិនន្ទនសីលាវ. កាមតណ្ហាទីសុ បញ្ចកាមគុណិកោ រាគោ កាមតណ្ហា នាម, រូបារូបភវរាគោ ឈាននិកន្តិ សស្សតទិដ្ឋិសហគតោ រាគោតិ អយំ ភវតណ្ហា នាម, ឧច្ឆេទទិដ្ឋិសហគតោ រាគោ វិភវតណ្ហា នាម. ភារាទានន្តិ ភារគហណំ. តណ្ហាយ ហិ ឯស ភារំ អាទិយតិ. អសេសវិរាគនិរោធោតិអាទិ សព្ពំ និព្ពានស្សេវ វេវចនំ. តញ្ហិ អាគម្ម តណ្ហា អសេសតោ វិរជ្ជតិ និរុជ្ឈតិ ចជិយតិ បដិនិស្សជ្ជិយតិ វិមុច្ចតិ, នត្ថិ ចេត្ថ កាមាលយោ វា ទិដ្ឋាលយោ វាតិ និព្ពានំ ឯតានិ នាមានិ លភតិ. សមូលំ តណ្ហន្តិ តណ្ហាយ អវិជ្ជា មូលំ នាម. អព្ពុយ្ហាតិ អរហត្តមគ្គេន តំ សមូលកំ ឧទ្ធរិត្វា. និច្ឆាតោ បរិនិព្ពុតោតិ និត្តណ្ហោ បរិនិព្ពុតោ នាមាតិ វត្តុំ វដ្ដតីតិ. បឋមំ.

២. បរិញ្ញសុត្តវណ្ណនា

២៣. ទុតិយេ បរិញ្ញេយ្យេតិ បរិជានិតព្ពេ, សមតិក្កមិតព្ពេតិ អត្ថោ. បរិញ្ញន្តិ អច្ចន្តបរិញ្ញំ, សមតិក្កមន្តិ អត្ថោ. រាគក្ខយោតិអាទិ និព្ពានស្ស នាមំ. តញ្ហិ អច្ចន្តបរិញ្ញា នាម. ទុតិយំ.

៣. អភិជានសុត្តវណ្ណនា

២៤. តតិយេ អភិជានន្តិ អភិជានន្តោ. ឥមិនា ញាតបរិញ្ញា កថិតា, ទុតិយបទេន តីរណបរិញ្ញា, តតិយចតុត្ថេហិ បហានបរិញ្ញាតិ ឥមស្មិំ សុត្តេ តិស្សោ បរិញ្ញា កថិតាតិ. តតិយំ.

៤-៩. ឆន្ទរាគសុត្តាទិវណ្ណនា

២៥-៣០. ចតុត្ថាទីនិ ធាតុសំយុត្តេ វុត្តនយេនេវ វេទិតព្ពានិ. បដិបាដិយា បនេត្ថ បញ្ចមឆដ្ឋសត្តមេសុ ចត្តារិ សច្ចានិ កថិតានិ, អដ្ឋមនវមេសុ វដ្ដវិវដ្ដំ. ចតុត្ថាទីនិ.

១០. អឃមូលសុត្តវណ្ណនា

៣១. ទសមេ អឃន្តិ ទុក្ខំ. ឯវមេត្ថ ទុក្ខលក្ខណមេវ កថិតំ. ទសមំ.

១១. បភង្គុសុត្តវណ្ណនា

៣២. ឯកាទសមេ បភង្គុន្តិ បភិជ្ជនសភាវំ. ឯវមិធ អនិច្ចលក្ខណមេវ កថិតន្តិ. ឯកាទសមំ.

ភារវគ្គោ តតិយោ.