៩. ឧបយន្តិសុត្តវណ្ណនា

៦៩. នវមេ ឧបយន្តោតិ ឧទកវឌ្ឍនសមយេ ឧបរិ គច្ឆន្តោ. មហានទិយោតិ គង្គាយមុនាទិកា មហាសរិតាយោ. ឧបយាបេតីតិ ឧបរិ យាបេតិ, វឌ្ឍេតិ បូរេតីតិ អត្ថោ. អវិជ្ជា ឧបយន្តីតិ អវិជ្ជា ឧបរិ គច្ឆន្តី សង្ខារានំ បច្ចយោ ភវិតុំ សក្កុណន្តី. សង្ខារេ ឧបយាបេតីតិ សង្ខារេ ឧបរិ យាបេតិ វឌ្ឍេតិ. ឯវំ សព្ពបទេសុ អត្ថោ វេទិតព្ពោ. អបយន្តោតិ អបគច្ឆន្តោ ឱសរន្តោ. អវិជ្ជា អបយន្តីតិ អវិជ្ជា អបគច្ឆមានា ឱសរមានា ឧបរិ សង្ខារានំ បច្ចយោ ភវិតុំ ន សក្កុណន្តីតិ អត្ថោ. សង្ខារេ អបយាបេតីតិ សង្ខារេ អបគច្ឆាបេតិ. ឯស នយោ សព្ពបទេសុ. នវមំ.