២. ទុតិយអស្សុតវាសុត្តវណ្ណនា

៦២. ទុតិយេ សុខវេទនិយន្តិ សុខវេទនាយ បច្ចយំ. ផស្សន្តិ ចក្ខុសម្ផស្សាទិំ. ននុ ច ចក្ខុសម្ផស្សោ សុខវេទនាយ បច្ចយោ ន ហោតីតិ? សហជាតបច្ចយេន ន ហោតិ, ឧបនិស្សយបច្ចយេន បន ជវនវេទនាយ ហោតិ, តំ សន្ធាយេតំ វុត្តំ. សោតសម្ផស្សាទីសុបិ ឯសេវ នយោ. តជ្ជន្តិ តជ្ជាតិកំ តស្សារុប្បំ, តស្ស ផស្សស្ស អនុរូបន្តិ អត្ថោ. ទុក្ខវេទនិយន្តិអាទិ វុត្តនយេនេវ វេទិតព្ពំ. សង្ឃដ្ដនសមោធានាតិ សង្ឃដ្ដនេន ចេវ សមោធានេន ច, សង្ឃដ្ដនសម្បិណ្ឌនេនាតិ អត្ថោ. ឧស្មាតិ ឧណ្ហាការោ. តេជោ អភិនិព្ពត្តតីតិ អគ្គិចុណ្ណោ និក្ខមតីតិ ន គហេតព្ពំ, ឧស្មាការស្សេវ បន ឯតំ វេវចនំ. តត្ថ ទ្វិន្នំ កដ្ឋានន្តិ ទ្វិន្នំ អរណីនំ. តត្ថ អធោអរណី វិយ វត្ថុ, ឧត្តរារណី វិយ អារម្មណំ, សង្ឃដ្ដនំ វិយ ផស្សោ, ឧស្មាធាតុ វិយ វេទនា. ទុតិយំ.