៧. បច្ចយសុត្តវណ្ណនា

២៧-២៨. សត្តមេ បដិបាដិយា វុត្តេសុ បរិយោសានបទំ គហេត្វា កតមញ្ច, ភិក្ខវេ, ជរាមរណន្តិអាទិ វុត្តំ. ឯវំ បច្ចយំ បជានាតីតិ ឯវំ ទុក្ខសច្ចវសេន បច្ចយំ ជានាតិ. បច្ចយសមុទយាទយោបិ សមុទយសច្ចាទីនំយេវ វសេន វេទិតព្ពា. ទិដ្ឋិសម្បន្នោតិ មគ្គទិដ្ឋិយា សម្បន្នោ. ទស្សនសម្បន្នោតិ តស្សេវ វេវចនំ. អាគតោ ឥមំ សទ្ធម្មន្តិ មគ្គសទ្ធម្មំ អាគតោ. បស្សតីតិ មគ្គសទ្ធម្មមេវ បស្សតិ. សេក្ខេន ញាណេនាតិ មគ្គញាណេនេវ. សេក្ខាយ វិជ្ជាយាតិ មគ្គវិជ្ជាយ ឯវ. ធម្មសោតំ សមាបន្នោតិ មគ្គសង្ខាតមេវ ធម្មសោតំ សមាបន្នោ. អរិយោតិ បុថុជ្ជនភូមិំ អតិក្កន្តោ. និព្ពេធិកបញ្ញោតិ និព្ពេធិកបញ្ញាយ សមន្នាគតោ. អមតទ្វារំ អាហច្ច តិដ្ឋតីតិ អមតំ នាម និព្ពានំ, តស្ស ទ្វារំ អរិយមគ្គំ អាហច្ច តិដ្ឋតីតិ. អដ្ឋមំ ឧត្តានមេវ. សត្តមអដ្ឋមានិ.